Эрүүл мэндийн статистик тайлангаас үзэхэд нийт халдварт өвчний 30 гаруй хувийг хоол, хүнс, орчны бохирдолт, ариун цэврийн шаардлага хангаагүйгээс шалтгаалсан халдварт өвчин, хордлогот халдвар эзэлж байна. Зөвхөн өнгөрсөн онд улсын хэмжээнд хүнснээс гаралтай нянгийн хордлогын 379 тохиолдол бүртгэгдэж 10.000 хүн амд 1.5 промилл байгаа нь 2006 оны өвчлөлөөс 203 тохиолдол буюу 0.8 промиллээр ихэссэн байна.

Хоолны хордлого гарахад хүргэж буй хүчин зүйлүүд нь нийтийн хоол үйлдвэрлэгчдийн дотоодын хяналт сул, бизнес эрхлэгчид ашиг хонжоо олохыг урьтал болгож, хууль тогтомжоор хүлээлгэсэн үүргийг биелүүлдэггүй, хүнсний бүтээгдэхүүнийг зөв сонгож, зохистой хэрэглэх талаарх хэрэглэгчдийн мэдлэг, чадвар дутмаг зэрэгтэй холбоотой байна.Тухайлбал, гэрийн нөхцөлд бэлтгэж, хадгалалтын горим зөрчигдсөн бялуу, саладыг хуримын хүнсэнд хэрэглэснээс Баян-Өлгий аймагт хоолны хордлого гарсныг хяналт шалгалтаар тогтоосон байна.

Түүнчлэн 2007 онд "Үдийн цай" хөтөлбөрийн хүрээнд ерөнхий боловсролын сургуулиудад хэрэглэгдэж байгаа хүнсний бүтээгдэхүүний чанар, аюулгүй байдалд хийсэн шалгалтаар нийт сургуулийн 71.4 хувь зориулалтын бус тээврийн хэрэгсэл /такси, хувийн тэрэг/ -ээр, 4.7 хувь явганаар хүнсний бүтээгдэхүүнээ зөөвөрлөдөг, 47.6 хувь бүтээгдэхүүнээ өдөр бүр, 23.8 хувь 5-7 хоногийн, 28.5 хувь 14-ээс дээш хоногийн нөөцтэйгээр хүнсний бүтээгдэхүүнээ татан авч, нөөцөлдөг ба нийт сургуулийн 75.5 хувь хүнсний бүтээгдэхүүн хадгалах дээжийн хөргөгчгүй, 54.5 хувь бүтээгдэхүүн хадгалах тусгай өрөөгүй байна.

Сургуулиудын 14.4 хувь гар угаах нөхцөлөөр хангагдаагүй, гар угаагуурын тоо норматив хэмжээнээс гурав дахин цөөн буюу 107 сурагчид нэг гар угаагуур ногдож байгаа талаар шалгалтын материалд дурдсанаас үзэхэд "Үдийн цай" хөтөлбөрт хэрэглэгдэж буй хүнсний бүтээгдэхүүний чанар аюулгүй байдал болон сургуулиудын эрүүл ахуй, ариун цэврийн нөхцлийг сайжруулах шаардлагатай байна.