"Илүү аюулгүй ирээдүй" гэсэн нэр нь бидэнд сайхан санагдаж байгаа боловч Дэлхийн эрүүл мэндийн байгууллагын (ДЭМБ) 2007 оны илтгэл "энэ хорвоод тогтвортой зүйл алга болсон" гэх сэтгэгдлийг төрүүлж байна. Даяарчлалын эриний зөвхөн өнгөрсөн жилд хоёр тэрбум хүмүүс онгоцоор энд тэндгүй аялж байсан шиг халдварт өвчин бас л тийм хурдаар тархаж байв. "Дэлхийн нэг өнцөгт гарсан өвчин өөр хэсэгт нь онцгой байдал үүсгэхэд зөвхөн хэдхэн цаг л хэрэгтэй" хэмээн ДЭМБ-ын дүгнээд дахин шинэ өвчин гарахгүй гэсэн баталгаа байхгүй гэж уг байгууллага сануулж байна.

Өнгөрсөн зууны 1970 оноос өдгөө хүртэл, ДОХ-оос САРС, шувууны томуунаас Марбургийн тахал хүртэл 39 шинэ өвчин гарсан нь жилд дундажаар нэг шинэ өвчин нэмэгдэж байгааг харууллаа. Эдгээр өвчний 1100 голомт байгаа бөгөөд дэлхийн хүн амын 25 хувь буюу 1.5 тэрбум хүнийг хамаарах дэгдэлтэд мэргэжилтнүүд бэлтгэж байгаа юм. Олон улсын хамтын нийгэмлэг үүнд нэгдэн бэлэн байх ёстой. "Технологийн өндөр хөгжилтэй байлаа ч гэсэн ямар ч орон ганцаараа хүн амынхаа эрүүл мэндэд учрах заналын эсрэг зогсож чадахгүй" гэж ДЭМБ-ын илтгэлд онцолжээ. Даяарчлалын өвчиий энэ зууны шинэ жишээ нь САРС боллоо. САРС нь улс орнуудын хэрхэн хамтран ажиллахаас ямар эрсдэл эрүүл мэндэд учирч байна вэ гэдгийг харуулсан юм.

Шинэ нян гарч ирэхээс гадна хуучин ялсан гэх өвчин буцан гарах болсон нь аймшиг төрүүлж байна. Шар хижиг, тахал, Денге хижиг гээд л энэ жагсаалт урт. "Дэлхийн өмнөт хэсгийн олон орнуудад өвчний тархалт бодит болоод байна. ДОХ-ыг аваад үзэхэд л хангалтай. Энэ өвчинд нэрвэгдсэн хүмүүсийн 70 хувь нь Сахарын цөлөөс өмнөх нутагт амьдарч байна" гэж ActionAid  гэх Засгийн газрын бус байгууллагын Ерөнхий нарийн бичгийн дарга Марко дель Понте мэдэгдлээ.

Дэлхийн 1,1 тэрбум хүн ундааны усаар дутагдаж, амархан эмчлэгдэж болох халдварт өвчнөөр өдөр бүр 4500 хүүхэд өнгөрч байгааг ДЭМБ санууллаа. Өвчний тархалт улс төрийн хариуцлагагүйгээс гарч байна. Жишээлбэл, 2003 онд саа өвчний эсрэг тарилга нь хүүхдүүдийг ирээдүйд үргүй болгоно гэсэн цууг Нигерид тараасны улмаас олон мянган хүүхэд уг өвчнөөр өвчлөн тахир дутуу болсон байна. Мөргөлдөөн өвчний бас нэг том шалтгаан. "Анголын иргэний дайны үр дагавар нь Мабургийн хижиг болов. Уг өвчнөөр 2004-2005 онуудад 200 хүн өвчилсний 90 хувь нь амиа алджээ. Ийм хариуцлагагүй байдал нь 1960-аад оноос аймшигт өвчнүүдийг ялсан гэх "хуурамч" мэдээлэл тархан эрүүл мэндийн байгууллагуудад хөрөнгө оруулалт хийхийг багасгасанд илэрч байна.

Сүүлийн арван жилийн дотор байгалийн гамшиг, хими ба цөмийн байгууламжууд дахь осол, биотеррор, хачиг, хувалж, шувууны томуу мэтийн амьтадын өвчин зэрэг заналын тоо эрс ихсэв. Өдгөө улс орнуудын эрүүл мэндийн салбарын бүрэн хэмжээний ил тод хамтын ажиллагаа нь эдгээр заналын эсрэг зогсох цорын ганц зөв зам гэж ДЭМБ илтгэлдээ онцолжээ.