Зургаан настнуудын нэг анги 30-35, харин цэцэрлэгийн багачууд 25-30 хүүхэдтэй байхаар норматив хэмжээ заасан байдаг. Гэтэл нийс­лэлийн төвийн зарим сур­гууль, цэцэрлэг тэр хэм­жээг зөрчсөн нь мэргэжлийн хянал­тын байцаагчдын шал­галтаар тогтоогджээ. Чингэл­тэй дүүргээс гэхэд хэд хэдэн зөрчил илэрсэн байна. Тус дүүргийн Эрүүл ахуйн хянал­тын ахлах байцаагч Ч.Ган­тулга цэцэрлэгт хийсэн шал­галтынхаа тухай ярихдаа "Ерөнхийдөө шалгалтаар нэг ангид байх хүүхдийн тоо хэмжээнээсээ давж, нягтар­сан дутагдал их гарлаа.

Тод­руулбал, 39 дүгээр цэцэр­лэгийн нэг анги нь 45 хүүхэд­тэй байсан. Хүүхдийн тоо их байна гэдэг нь халдварт өв­чин даамжрах гол нөхцөлийг бүрдүүлдэг төдийгүй сургал­тын чанарт эрс нөлөөлдөг. Харин 5, 9, 33 дугаар цэцэрлэг шаардлага хангасан орчинд үйл ажиллагаагаа явуулж байсан" гэлээ. Хүүхдүүдийн нягтрал юутай холбоотой болохыг түүнээс асуухад "Хотын хүн ам жил ирэх тусам нэмэгдэж, цэцэрлэгийн бай­шин нэмж барихгүй байгаа болохоор ачааллаа даахгүй болж байна. Нөгөөтэйгүүр төвийн дүүргийн цэцэрлэгүүд илүү үйлчилгээ сайтай байдаг болохоор эцэг, эхчүүдийн сонирхол тийшээ давамгайл­даг" гэв.

Зургаан настнуудын хи­чээллэх орчин ямар байсан талаар тус дүүргийн боловс­ролын ахлах байцаагч С.Бат­мөнхөөс дараахь асуултад хариулт авлаа.

-Сургуулиуд бяцхан су­рагчдад тохирсон сурах орчныг бүрдүүлж чадсан байна уу?
-Улсын хэмжээнд энэ сарын сүүлээр зургаан наст­нуудад зориулсан ширээ  сандлыг бүрэн хангана гэсэн байгаа. Зарим сур­гууль зо­риу­лалтын бус ширээ сан­далтай байсан л даа.

-Сургуулиуд норматив хэмжээг барихгүй зөрчил цөөнгүй байна гэсэн. Тэр сургуулиудыг нэрлэж бо­лох уу?
-Шалгалтаар зургаан наст­­­­нуудад зориулсан орчинг 24, 50, 57, 37 дугаар сургууль сайн бүрдүүлж чадсан байна лээ. Зарим сургууль 35-аас дээш хүүхэдтэй байсан. Тэр дундаа гадаад хэлний гүнз­гийрүүлсэн сургалттай 23 дугаар дунд  сургуулийн зур­гаан настнуудын нэг анги нь 42-47 хүүхэдтэй байна лээ. Манайхаас тэдгээр зөрчил дутагдлыг нь арилгуулах ал­бан бичиг хүргүүлээд байгаа.

-Сургуулийн захир­гаа­ны зүгээс энэ тухай юу гэж тайлбарлаж байна вэ?
-Захирал нь "Яамнаас сандал ширээ өгнө гэсэн. Тэрийг хүлээж байна" гэсэн л дээ. Тэднийд хоёр ангийн сандал ширээ ирэх юм билээ.

-Тус сургуульд хичнээн зургаан настны анги байдаг юм бэ?
-Өглөө, өдөр гурав, гур­ваа­раа ээлжилж ордог зур­гаан ангитай  гэв. 

50 жилийн түүхтэй гадаад хэлний гүнзгийрүүлсэн сур­галттай 23 дугаар сургууль дээр очиж, зургаан настай сурагчид хэрхэн хичээллэж байгааг сонирхлоо. Хоёр­дугаар ээлжийн сурагчид аль хэдийнэ ирчихсэн байв(13.30 цагийн үед). Гурван анги хичээллэж байлаа. Сурагч бүр өөрсдөдөө тохирсон нэг ширээ, сандалд тухлан хи­чээлээ хийцгээж байлаа. Дээрх ангиуд 34-36 хүүхэд­тэй байв. Журналын нэрсийг харвал сурагчдын тоотой тэнцэж байсан юм. Ямар учраас тус сургуулийг мэр­гэж­лийн хяналтынхан зөрчил­тэй гэснийг нийгмийн ажил­тан Л.Цэрэнхандаас тод­руулахад "Өчигдөр мэргэж­лийн хянал­тынхан шалгаад явсан. Тэд­нийг ирэх үеэр өглөө ордог ангийнхан ангиас гараагүй байхад өдрийн ээлжийн су­раг­чид ороод ирсэн юм. Энэ үед байцааг­чид орж ирчихээд хүүхдүү­дийг тоолоод жур­налыг нь ч харахгүй, зөр­чилтэй байна гээд явцгаасан" гэлээ.

М.Мөнхцэцэг