Баруун дөрвөн замаас Зүүн дөрвөн зам хүртэлх 3.48 км үргэлжилсэн автозамын засвар шинэчлэлийн ажил эхлээд cap гаруй болж байна. Төв замын хөдөлгөөнийг хэсэгчилэн хааж, борооны ус зайлуулах шугам, хоолой, гэрэлтүүлэг, хучилт, автозамын болон нийтийн тээврийн зогсоол, замын хашлага, тэмдэг тэмдэглэгээг шинэчлэн хийж эхнээсээ зарим хэсэг нь ашиглалт орж буй билээ.

Баруун дөрвөн замаас Чоймболын гудамж буюу 11 дүгээр сургуулийн уулзвар, эндээс Улсын их дэлгүүрийн зүүн тал хүртэлх замын засвар дуусч өмнөхөөсөө өргөн бас тэмдэг тэмдэглэгээ тодтой сайхан замаар нийслэлийнхэн зорчиж эхэлсэн. Мөн Монгол бөхийн өргөөний уулзвараас Зүүн дөрвөн зам хүртэлх замын засвар дуусч хөдөлгөөн хэвийн болсон.

Мөн ХХААХҮЯ-ны уулзвараас баруун тийш МУБИС-ийн туслах зам хүртэл хэсгийн хөдөлгөөнийг нээж зам засварын ажил хуваарийн дагуу явж байгаа. Энэ сарын 3-наас Чингэлтэй дүүргийн нутаг "Цэцэг төв"-ийн уулзвараас зүүн тийшээ Төв шуудангийн уулзвар хүртэлх замыг 10 хоногийн хугацаатай хаасан. Мөн Сүхбаатар дүүргийн нутагт Гадаад харилцааны яамны баруун хойд уулзвараас зүүн тийшээ МУБИС-ийн баруун урд уулзвар хүртэлх замыг долоо хоногийн хугацаатайгаар хаан замыг засч байна.

Дээрх замууд хаалттай байгаа учир нийтийн тээврийн автобусны чиглэлд өөрчлөлт орсон. Үүнд: Үйлдвэр-7 буудал, Зайсан-МУБИС, Яармаг-МУБИС, Зурагт-Зүүн салаа, Нисэх-МУБИС, Хайлааст-МУБИС, Чингэлтэй-МУБИС, Ээрмэл-Баруун хүрээ хороолол, Зайсан-Зам гүүрийн авто бааз чиглэлүүдийн хөдөлгөөн өөрчлөгдсөн байна.

Эдгээр чиглэлд үйлчилж буй автобус урдаас хойш явахдаа Их сургуулийн гудамж буюу Соёлын төв өргөөний өмнөх зөвхөн хойшоо урсгалтай замаар, хойд чиглэлээс Чингисийн өргөн чөлөө хүрэхдээ Сүхбаатарын гудамж буюу Сүхбаатарын талбайн баруун талаар явж үндсэн маршрутандаа орж явна. Харин М:25 буюу Баянхошуу-"Ард" кино театр чиглэлийн автобус хуучнаар "Ард" кино театр хүрээд "Цэцэг" төвийн уулзварт хаалтын наагуур буцаж эргэн "Ард", "Тэнгис" кино театрын зогсоолд зогсож түүнээс цааш үндсэн маршрутаараа явах юм байна.