Манай улсад малын гоц халдварт өвчин болох боомоор хүн нас барсан тохиолдол бүртгэгдлээ. Талийгаач Хөвсгөл аймгийн Цэцэрлэг сумын VI багийн Чулуун хашааны Гав гэдэг газар нутагладаг байжээ. Тус газраас энэ сарын 24-ний өдөр иргэн М, Л нар худгаас ус авч байхдаа санамсаргүй байдлаас болж гэраа шалбалсан аж. Гэтэл орой бие нь муудаж, өндөр халуурч эмнэлэгт хүргэгджээ. Үүний улмаас биеийн байдал нь дээрдэхгүй байсаар энэ сарын 25-ны өдөр нэг нь нас нөгчсөн байна.

Талийгаачийн үхлийн шалтгааныг боомын халдвар гэж тогтоогоод байгаа аж. Мөн аймгийн Жаргалант сумын I багийн Тойм байц хэмээх газар энэ сарын 17-ны өдөр гурван хонь боомоор өвчилжээ. Үүнтэй холбогдуулан 14 хоногийн хугацаатай хорио цээрийн дэглэм тогтоогоод байна. Үхсэн малаас авсан шинжилгээний хариугаар хөрсний боом болох нь нотлогдсон аж. Боомоор хүн нас барсан талаар Байгалийн голомтод халдварт өвчин судлалын үндэсний төвөөс тодруулахад" Малын халдварт өвчнөөр хүн нас барсан нь анх удаагаа гарлаа" гэсэн хариултыг өгсөн.

Түүнчлэн Сэлэнгэ аймгийн Сайхан сумын III багийн нутаг Ширээ нуруунд энэ сарын 21-нд боом өвчнөөр нэг хонь өвчилснөөс халдвар авсан II багийн малчин Н-ийг аймгийн Нэгдсэн эмнэлэгг хэвтүүлжээ. Өвчтөний биеийн байдал дээрдэж байгаа аж. Боом гарсан хот айлын 1500гаруйбог,40-өөд бод малд урьдчилсан байдлаар тарилга хийсэн байна. Нөхцөл байдалтай холбогдуулан аймгийн Онцгой байдлын хэлтсээс хорио цээрийн дэглэм тогтоожээ. Мөн шалган нэвтрүүлэх цэг ажиллуулж, гүүрээр мал, мах, арьс шир, сүү цагаан идээ зэрэг малын гаралтай түүхий эд оруулахыг хориглосон байна.

Боом өвчин гарсантай холбогдуулан Хөвсгөл аймгийн Онцгой байдлын хэлтсийн орлогч дарга С.Даваасүрэнгээс зарим зүйлийг тодрууллаа.

-Танай аймагт боомоор хүн нас барсан гэсэн. Энэ талаар мэдээлэл өгөөч?
-Тийм ээ. Энэ сарын 24-ны 22.05 цагийн үед 25 настай Л халуурсан байдалтай аймгийн эмнэлэгт хүргэгдсэн. Тэр хүн 25-ныхаа 05.00 цагийн үед нас барсан байгаа.

-Шинжилгээний хариугаар боом болох нь тогтоогдсон уу?
-Талийгаачаас авсан шинжилгээний хариугаар боом болох нь тогтоогдсон. Харин хөрснөөс авсан шинжилгээний хариу ирээгүй байна. Удахгүй гарах байх.

-Талийгаач боомын халдварыг яаж авсан юм бол?
-Л нь худагаас ус авч байхдаа гартаа шарх авсан. Шарх авсан оройдоо халуурч, арьс нь хавганасан байсан.

-Халдвар гарсан газарт хорио цээрийн дэглэм хэр явагдаж байна вэ. Ариутгал хийсэн үү?
-Аймгийн гоц халдвартаас арав гаруй хүний бүрэлдэхүүнтэй баг ажиллаж байгаа. Ариутгалыг хангалттай хийсэн. Мөн тухайн орчны малыг вакцинжуулж байгаа.

А.Лхагважав