Монгол Улсын Хөдөлмөрийн баатар, Гавьяат тамирчин, Чөлөөт бөхийн ДАШТ-ий анхны хүрэл медальт, Олимпын наадмын анхны мөнгөн медальтан, хүндэт пропессор, Даяар Дурсагдах, Далай, Даян Дархан аварга Жигжидийн Мөнхбатын гэрэлт хөшөөний нээлт /2025.06.03/ боллоо.

Төв цэнгэлдэх хүрээлэнгийн гадна талбайд сүндэрлэсэн хөшөөний нээлтэд Дархан аваргын гэргий Тамир, хүү мэргэжлийн сүмогийн 69 дэх их аварга М.Даваажаргал болон Монгол Улсын үе үеийн Дархан аваргууд, их спортынхон, төр нийгмийн зүтгэлтнүүд хүрэлцэн ирж, хүндэтгэл үзүүллээ.



Мөн үеэр Дархан аваргын эдлэл хэрэглэл, гавьяа шагнал, дурсгалын зүйл тэргүүтнийг үзэсгэлэн болгон дэлгэжээ.

Ж.Мөнхбат аваргын хөшөөг бүтээсэн уран барималч Ж.Түмэнчулуун, "Домогт аваргын хөшөөг бүтээх хувь тохиол оногдсонд маш их баяртай байна. Энэхүү хөшөөг бид 2.5 тонн хүрлээр хоёр жилийн хугацаанд урласан. 2500 жилийн турш хадгалагдаж болох бат бөх.

Хөшөөн дээр Ж.Мөнхбат аваргын намтар түүх, амжилтын талаарх мэдээллийг багтаасан QR код хийсэн нь Монголын бусад хөшөө дурсгалаас онцлог болсон" гэлээ.

Түүнчлэн Ж.Мөнхбат аваргын гэрэлт хөшөөний нээлтэд зориулан өсвөрийн 64 бөхийн барилдаан, сур харваа, шагайн харваачид цэц сорьсон бэсрэг наадам болов.

Б.Ану