“Чиний нүдээр би амьдралыг анх өнгөтэй харсан”....

Тийм ээ, яг л “Сүүлийн уянга”-ын энэ үг шиг “Lemons”-ийн тоглолт үзэхээр ирсэн залуусыг өнгөлөг нүдээр харж зогслоо. Үнэхээр тэд “Харанга”-ын “Амьдрал” дууны клип дээр гардаг шиг урт үстэй, хар савхитай бас хар нүдний шилтэй, хайртай охиноо бас залуугаа хөтөлчихсөн, “Амьдрал” дууныхаар төсөөлж үлдсэн тэр л хуучны цаг хугацааных шиг “өнгөтэй” байв.

Хаалга нээгээгүй байхад залуус ирчихсэн даруухнаар дугаарлан зогссон байлаа. Даруухнаар гэж тодотгосон нь аливаа бухимдал, арсалдах, уралдах зүйлгүй гэсэн үг. Нэг тийм, намуухан, тайван. Дотогш орвол “Red zone” гэсэн хаягтай жижиг тасалгааны үүдэнд дараалал үүсжээ. Тасалгаан дотор “Lemons”-ийнхон зурагт хуудас дээр гарын үсгээ зурж, тэнд хуурцаг худалдаалж байлаа. Тийм ээ, энэ бол “Lemons” хамтлагийн кассетны баяр. Бидний мэдэх “Залуу Лениний ойролцоо 3 давхарт” цомог кассет /tape/ хэлбэрээр эргээд ирж буй нь энэ.

“Сайн байна уу, солонгорон харагдах миний нийслэл”...

Тийм ээ, яг л “1983-86” дууны клип дээрх хуучин цагийнх шигээр бид одоо “Lemons”-ыг, “Залуу Лениний ойролцоох 3 давхарт” цомгийг хуурцгаар сонсоно. Том өсгөгч, гоё хөгжим, бүх юм байдаг ютүбээс биш зорин хайж, зориуд худалдан авсан хуурцаг тоглуулагчаар кассет сонсоно.

Толгойн дороо хоёр гараа зөрүүлж дэрлэн дээш харж хэвтээд, нүдээ анина. Тэгээд яг л 1986 он эргээд ирсэн мэт, тэр цаг хугацаанд амьдарч асан мэтээр цаг хугацаагаар аялна. Тэгээд буцаад кассет тоглуулагч моод болж, ирэх 12 сард, шинэ жилийн баяраар залуус, хосууд, монитагийн бэлэгт “Lemons”-ийн кассет нэрлэгдэнэ. Тийм ээ, хуурцаг эргээд ирлээ.

“Уучлалт гуйх хэрэггүй ээ, ухаалаг чамд минь буруу байхгүй”...Тийм ээ, одоо бид “Хайртай”-г хуурцгаар сонсоно.

Богино долгионы радио буюу фм их сонсдог байлаа. Унтахаа умартан сонсдог байв. Нэг орой фм-д холбогдсон залуу хайртай хүнээ гомдоосон тул уучлалт гуйж, үүнийгээ хөтлөгчөөр дамжуулж найз бүсгүйдээ хэлэв. Гэтэл өөдөөс нь бүсгүй маш тоомжиргүйгээр зөрүүлээд “Lemons-Хайртай”-г зориулъя гэж хэлчхээд утсаа тасалчихсан. Хөтлөгч дууны нэрийг сонссон даруйд бүсгүй залууг уучиллаа гэж баярласан ч үнэндээ “Намайг мартаад жаргалаа ол, найз нь ингээд чамайг орхиё” гэдэг үгийг нь сонссон даруйд ёстой л “Би юу хийчхэв ээ” гээд хоцорсон доо.

“Хайртай”-г сонсохоор үүнийг би үргэлж нэхэн санадаг юм. Хэчнээн хос “Хайртай”-г сонсон эвлэрч бас хэчнээн нь салж, холдоод “Хайртай”-г сонсож санаашраа бол... Одноо “Хайртай”-гаа дуулсаар байгаа цагт амьдарсаар л байх болно гэж би хэлэх бас бичих дуртай. Тийм ээ, Одноо тэгээд "Lemons" минь амьдралд байдагт баярлалаа.