Өчигдөр үдээс өмнө Хятадын зүүн бүсийн Шаньдун мужид орших нэгэн химийн үйлдвэрт болсон хүчтэй дэлбэрэлтийн улмаас 5 хүн амиа алдаж, 19 хүн гэмтэн, 6 хүн сураггүй алга болжээ.

Энэ тухай төрийн мэдлийн Шиньхуа агентлаг орой нь мэдээлэхдээ дэлбэрэлтийн шалтгааныг дурдаагүй байна. Дэлбэрэлт "Shandong Youdao Chemical" компанийн химийн үйлдвэрт болсон ба орон нутгийн галын болон аврах албанаас 55 тээврийн хэрэгсэл, 232 аврагчийг газар дээр нь илгээжээ.

Тус компани нь Himile Group компанийн харьяа бөгөөд бөгөөд тус групп нь хөрөнгийн зах зээлд бүртгэлтэй Himile Mechanical компанийг мөн эзэмшдэг. Ройтерс агентлагийн мэдээлснээр, Мягмар гарагийн үдээс хойш тус компанийн хувьцааны ханш бараг дөрвөн хувиар буурсан байна.

2019 оны наймдугаар сард байгуулагдсан “Shandong Youdao Chemical” компани 46 га гаруй газрыг эзэмшдэг, 300 гаруй ажилтантай бөгөөд химийн завсрын бүтээгдэхүүн, хортон шавжийн хор болон эмийн үйлдвэрлэлд ашиглагддаг бодисууд үйлдвэрлэдэг аж.

Сануулахад, 2015 онд, Тяньжинд аюултай, шатамхай бодис хадгалж байсан агуулахад хоёр том дэлбэрэлт болж, 170 гаруй хүн амиа алдаж, 700 гаруй хүн шархдаж, хорт утаа агаарт тархаж байсан билээ.

Эх сурвалж: Ройтерс