УОК-ын дэргэдэх Эрдэмтдийн зөвлөлийн гишүүн О.Батбаяр цар тахлын эсрэг авсан Монгол Улсын хариу арга хэмжээ хэд хэдэн онцлогтой байсан. Үүний үр дүнд нас баралт бусад оронтой харьцуулахад дөрөв дахин бага байна гэв.

Өнөөдрийн байдлаар манай улсад нийт 2100 иргэн цар тахлын улмаас амиа алдсан.  

О.Батбаяр "Засгийн газраас вакцинаар сайн хангасан. Вакцины олон төрлийн сонголтыг бий болгосон. Иргэд хоёр болон гурав дахь тунд идэвхтэй хамрагдлаа. Мөн бид иргэдэд вирусын эсрэг эмчилгээг эрт эхлэх боломжийг иргэдэд олгосон. ДЭМБ-ын зөвлөмжийн дагуу, Засгийн газрын санхүүжилтээр Эрүүл мэндийн даатгалын ерөнхий газрын дэмжлэг, өрхийн эмнэлгээр дамжуулан даатгалтай, даатгалгүй, дотоод, гадаад гэлтгүй бүх хүнд эмийн багц олгосон.

Манай улс зөвхөн хүнд өвчтөнүүд төдийгүй хүндрэх эрсдэлтэй өвчтөнүүдийг эмнэлэгт хэвтүүлсэн. Дийлэнх улсад зөвхөн хүнд өвчтөнүүдээ хэвтүүлсэн юм. Бид оргил үед ковидын орыг 23 мянга хүртэл нэмсэн юм. Эдгээрийн үр дүнд нас баралтыг бага түвшинд барих боломжийг олгосон.                 

2021 оны арван хоёрдугаар сарын 31-ний байдлаар АНУ, Их Британи, Франц, Итали зэрэг орнуудад нэг сая хүн ам тутамд 2200-2400 нас баралт бүртгэжээ. Манай улсад энэ үзүүлэлт 580 байлаа. Хөгжингүй орнуудаас дөрөв дахин бага нас баралт бүртгэсэн нь бидний ковидтой тэмцсэн стратеги зөв байсныг батална.

2021 оны долдугаар сараас бид цар тахалтай дасан зохицох, хөл хориог багасгах,  сүргийн дархлаа бий болгох, хайбрид дархлаа бий болгоход анхаарлаа. Үүний үр дүнд омикроны давлагааг хүндрэл, нас баралт, эмнэлгийн ачаалал багатай даван тууллаа" гэв.

Манай улсад цар тахлын улмаас амиа алдсан иргэдийн нас баралтын шалтгаан

75 хувь нь зүрх судасны өвчинтэй
25 хувь нь чихрийн шижинтэй
11.8 хувь нь бөөрний эмгэгтэй
11.3 хувь нь элэгний эмгэгтэй
7.7 хувь нь мэдрэлийн эмгэгтэй
7 хувь нь хавдартай
5 хувь нь хэт таргалалттай байжээ.

Нийт өвчтөнүүдийн 79 хувь нь архаг хууч өвчин ковид хавсарсны улмаас нас барсан бол 20 хувь нь ковид шалтгаант байна.