"Монголын эдийн засгийн форум 2022-Шинэ сэргэлт"-ийн хүрээнд Уул уурхай, хүнд үйлдвэрийн яам, Хүнс, хөдөө аж ахуй, хөнгөн үйлдвэрийн яам, Байгаль орчин, аялал жуулчлалын яам, Соёлын яамнаас зохион байгуулж буй "Аж үйлдвэржилтийн сэргэлт" урьдчилсан хэлэлцүүлэг болж байна.

Корпорэйт конвеншн центрт "Шинэ сэргэлтийн бодлого-Аялал жуулчлал" хэлэлцүүлэг одоо болж байна. Оролцогчид цахим виз олголтыг дахин сэргээх, "Монголчууд бол язгуурын нүүдэлчид" гэсэн имижийг улам бататгах, гадаад улсуудад харуулах имижээ, уриагаа ойр ойрхон өөрчлөхгүй байх, агаарын тээврийг либералчлах, тогтвортой бодлого явуулах, бусад салбартай харилцан уялдаатай байх саналуудыг хэлэв. Мөн манай иргэд гадаад улсуудад зарцуулж буй мөнгө Монголд ирдэг гадаад жуулчдын оруулдаг орлогоос илүү байдаг тул эдийн засгийн хувьд алдагдал үүсдгийг, сумын захиргаанаас дэмждэггүй, дарамт ихтэй байдгийг онцлов.

Бизнесийн аялал жуулчлал буюу хурал цуглаанд оролцохоор ирсэн гадаад иргэд хамгийн их орлого оруулдаг тул энэ төрлийн аялал жуулчлалд анхаарах, хоёр жил шахуу хугацаанд сул зогссон, хүний нөөцийн дутагдалд орсон тул БШУЯ энэ тал дээр дэмжлэг үзүүлэх санал дэвшүүллээ.      

Ирэх сарын 4-нд аялал жуулчлалын үндэсний форумыг ЭСЯ-дтай хамтран зохион байгуулна гэж БОАЖ-ын сайд мэдээлэв. Аялал жуулчлалын салбарын сэргэлт удаан үргэлжилнэ гэдэг дээр оролцогчид санал нэгдэв.   

БОАЖ-ын сайд Б.Бат-Эрдэнэ:
-Би баруун таван аймгаас бусдад нь очлоо. Хустайн нурууны жишгээр аялал жуулчлалыг хөгжүүлье. Хустайн нурууны байгалийн цогцолбор газар сүүлийн жилүүдэд улсаас нэг ч төгрөг аваагүй. Агаарын тээврийг  либералчилснаар МИАТ өрсөлдөөнд орж, илүү хөгжинө. Томоохон авиа компаниуд орж ирэх ёстой. "Катар Эйрвэйс" нисэг л дээ. Open air системийг МИАТ-д ажилладаг хүмүүс албаар хольж хутгаж, буруу ярьдаг.

Манай улсад сайн стандарт, аялал жуулчлалын сайн компаниуд бий. Заавал олон улсын стандарт нэвтрүүлэх шаардлагагүй. Манай улсад 6000 стандарт бий. Эдгээрийг олон улсын стандартыг MNS болгон баталсан шүү дээ.   

Ковидын нөлөөнд хамгийн их өртсөн салбарын нэг нь аялал жуулчлал. Томоохон зочид буудлууд үл хөдлөх эд хөрөнгийн, баазууд тусгай хамгаалалттай газар нутгийн гэх мэт  өндөр татвар төлдөг. Татвараа төлж чадаагүй компаниудын дансыг хааж эхэлжээ.