2023 онд дэлхийн хотуудын агаарын бохирдлын чанар ямар хэмжээнд байсныг Швейцарын “IQAir” компани танилцуулжээ. Тайланд дурдсанаар хамгийн их агаарын бохирдолтой 100 хот Ази тивд байгаа юм.

Үүний 83 нь Энэтхэг улсын хотууд юм. Эдгээр хот нь Дэлхийн эрүүл мэндийн байгууллагаас зөвшөөрсөн агаарын бохирдлын хэмжээнээс 10 дахин хэтэрсэн байна.

Тайланд нийт 7812 хотыг хамруулсан бөгөөд Улаанбаатар хот жагсаалтын 982-т бичигджээ. Манай нийслэл дэх РМ2.5 тоосонцрын дундаж хэмжээ 22.5.
ДЭМБ-ын тогтоосон стандартын дагуу уг тоосонцрын хэмжээ 5 мкг/м³-ээс хэтэрвэл бохирдолтойд тооцогдох аж.

Хамгийн их агаарын бохирдолтой хотуудын жагсаалтын нэгдүгээрт Энэтхэгийн Бегусарай хот орсон бөгөөд РМ2.5 тоосонцрын хэмжээ нь 118.9 мкг/м³ буюу ДЭМБ-ын стандартаас 23 дахин хэтэрсэн байгаа юм.

Тайлангаас харвал Энэтхэг улс дахь 1.3 тэрбум хүн амын 96 хувийнх нь амьдарч буй орчин хэвийн хэмжээнээс дор хаяж долоо дахин хэтэрсэн агаарын бохирдолтой байна. 

ДЭМБ-ын уг стандартын шаардлагыг ердөө 10 улс хангажээ. Шатахууны түлшнээс үүдэлтэй агаарын бохирдлын улмаас жил бүр 5.1 сая хүн нас бардаг гэсэн судалгаа бий. 

Эх сурвалж: CNN