Монгол Улс барааг түр хугацаагаар оруулах тухай Станбулын конвенцод нэгдэн орсон. Иймд үзэсгэлэн яармаг худалдаа, уулзалт   түүнтэй ижил төстэй арга хэмжээ болон мэргэжлийн тоног төхөөрөмж, боловсрол соёл шинжлэх ухааны зориулалттай барааг гаалийн болон бусад татвар төлөхгүйгээр түр хугацаагаар оруулаад буцааж гаргах боломжтой. Энэ тохиолдолд МҮХАҮТ-д хандаж АТА карней авч болдгийг Гаалийн хяналтын бүрдүүлэлтийн газрын, гаалийн улсын байцаагч М.Лхагвачулуун хэллээ.

Энэ талаар тэрбээр “Хадгалалтын тусгай нөхцөл шаарддаг түргэн гэмтэж муудах бараа, худалдаж борлуулах бараа, олон нийтэд тараах сурталчилгааны материал зэрэгт АТА карней олгодоггүй.

АТА карнейг конвенцын гишүүн 70 гаруй улсын Худалдаа Аж Үйлдвэрийн Танхимаас тухайн барааг буцааж нэвтрүүлэх  нөхцөлтэйгөөр  нэг жилийн хугацаагаар олгодог. Монгол Улсын Засгийн газрын 2003 оны 145 дугаар тогтоолоор АТА карнейг олгох, түүнтэй холбогдон үүсэх харилцааг хүлээх, баталгаа гаргах  үүргийг Монголын Худалдаа, Аж Үйлдвэрийн Танхимд олгосон. Иймд АТА карней авах хүсэлтээ МХАҮТ-д гаргаж болно” гэв.

АТА карней нь улсын хилээр түр хугацаагаар оруулах нэр бүхий барааны хувьд гаалийн болон бусад хураамж төлөлгүйгээр, гаалийн мэдүүлгийг орлон олон улсын хэмжээнд хэрэглэгддэг гаалийн бичиг баримт юм.

Эх сурвалж: Гаалийн ерөнхий газар