• Үйл ажиллагааны хүрээнд хагалгааны явцыг шууд дамжуулан хүргэв
• Мөн есөн орны 15 эрдэмтэн, мэс засалч хүрэлцэн иржээ
• ХСҮТ-ийн элэг цөс, нойр булчирхайн мэс заслын тасаг өнгөрсөн онд 900 гаруй хагалгааг гүйцэтгэжээ

ХСҮТ-ийн элэг цөс, нойр булчирхайн мэс заслын тасаг байгуулагдсаны 15 жилийн ойг угтан “Элэгний хавдрын мэс заслын 7 хоног”-ийг зохион байгуулж байна.

Үүний хүрээнд хамтран мэс засал хийх, туршлага солилцох, хурал, сургалт зохион байгуулах зорилгоор есөн орны 15 эрдэмтэн, мэс засалч иржээ.

ХСҮТ-ийн Ерөнхий захирал Д.Эрдэнэхүү, элэг цөс, нойр булчирхайн тасаг тусдаа байх ёстой гээд байгуулсан. Тус тасаг жилд дунджаар 800-1500 хагалгааг гүйцэтгэдэг.

Өнгөрсөн оны хувьд 900 гаруй мэс засал хийсэн. Элэг цөс нойр булчирхайн тасгийн нийт ажилчдадаа ойн баярын мэнд хүргэе гэсэн юм.

Мөн эхний өдрийн байдлаар хагалгааны үйл явцыг шууд дамжуулж, мэс заслыг удирдаж буй эмч нар тайлбар хийх байдлаар сургалт орлоо.

Тус сургалтын талаар ХСҮТ-ийн элэг шилжүүлэн суулгах албаны дарга Р.Мөнхбат, хагалгааны явцыг шууд дамжуулах нь алдаа гаргахгүйгээр мэс засал гүйцэтгэдэг гэдгээ харуулах нэг хэлбэр.

Мөн энэ салбарын эмч нар иймэрхүү сургалтад зорьж очдог байсан бол шууд дамжуулалт өргөн хүрээг хамарч, эмнэлэгтээ сургалтын танхимд суралцах боломжтой боллоо хэмээн ярив.

Хагалгааны тухайд, дурангийн аргаар зүүн элэг тайрах, элэгний зүүн дэлбэн тайрах, дурангийн аргаар нойр булчирхайн сүүл хэсгийг дэлүүний хамт тайрах болон бусад мэс заслууд хийгдэж байгаа аж.