Сонгуулийн санал хураах үйл явц эхлээд гурван цаг орчмын дараа буюу 10.22 цагт Хулд сумын 34 дүгээр хэсэгт санал тоолох төхөөрөмж гацаж, 10:47 цагт хяналтын хэсэг нь хуралдснаар санал хураалтыг гар ажиллагаанд шилжүүлсэн байна.

Аймгийн сонгуулийн хороо нөөцөд байгаа төхөөрөмжийг Хулд сум руу 11 цаг 15 минутын үед явууллаа гэж сонгуулийн хорооны дарга Н. Эрдэнэ- Очир хэллээ. Хулд сум аймгийн төвөөсөө 98 зм зайтай юм. 47 хэсгийн хороонд нийт санал тоолох 48 төхөөрөмж ажиллаж байгаа бөгөөд нөөцөд 4 төхөөрөмж ирсэн ажээ.

Мөн хэсгийн хороод өглөө 07.00 цагт санал хураах үйл ажиллагаагаа эхлэх үед Дэрэн сумын 19, 21 дүгээр хэсэг, Адаацаг сумын 2 дугаар хэсэгт иргэний бүртгэлийн итгэмжлэгдсэн ажилтны сонгогчийн нэрийн жагсаалтын мэдээллийн сан бүхийн тоног төхөөрөмж болон санал тоолох төхөөрөмж кодоо уншихгүй алдаа заасан байна. Энэ саатлыг 20- 30 минутын дотор засч, төхөөрөмжүүд хэвийн ажиллагаанд шилжжээ.

Дундговь аймаг Т. Отгонтуяа