2025-2026 оны хичээлийн шинэ жил эхлэхэд цөөн хоног үлдлээ. Их, дээд сургуулийн дотуур байрууд оюутнуудаа хүлээн авч эхэллээ. Төлбөр нь харьцангуй хямд, сургуулийнхаа хажууд байрлалтай зэрэг давуу талтай учир орон нутгийн оюутнууд сургуулийнхаа дотуур байранд амьдрахыг илүүд үздэг. Гэвч дотуур байрны төлбөр, дээр нь сургалтын төлбөр нэмэгдсэн нь оюутнуудад санхүүгийн дарамт болж байна.

МУИС, МУБИС, ШУТИС болон сургууль сургуулийн оюутнуудын хүлээн авдаг “Оюутны өргөө” дотуур байраар очиж, төлбөрийн мэдээлэлтэй нь танилцлаа. 



МУИС-ийн үйлчилгээ хариуцсан ахлах мэргэжилтэн Х.Туяацэцэг, МУИС-ийн оюутнууд 8-р сарын 25-ны өдрөөс цахимаар дотуур байраа сонгож эхэлсэн. Манай сургууль зургаан дотуур байртай. I, II, III, V, VI байранд монгол оюутнууд, IV байранд гадаад оюутнууд амьдардаг. 

Манай сургуульд шинээр элсэж буй орон нутгийн болон алслагдсан дүүргийн оюутнууд 100 хувь дотуур байранд орох боломж олгодог. Дотоод журмын дагуу нэгдүгээр түвшний /курс/ оюутнууд болон хөгжлийн бэрхшээлтэй суралцагчид түрүүлж өрөөгөө сонгоно.

Энэ жил манай сургуульд шинээр 4200 оюутан элссэн. Үүнд үндэслэн  нэгдүгээр түвшний 650 оюутныг дотуур байранд авахаар бэлдээд байна.

Бид дотуур байрандаа жил бүр их болон урсгал засвар хийдэг. VI дотуур байр буюу Худалдааны сургуулийн байр засвар, тохижилт хамгийн муутай  ч бид энэ асуудлыг шийдвэрлэхээр засвар хийж байна.

Инфляцитай уялдуулан энэ жил дотуур байрны төлбөр 15 хувиар нэмэгдсэн. Оюутны төлбөрийг бид дотуур байрны урсгал засвар болон бусад зардлыг санхүүжүүлэхэд зарцуулдаг.

-Дотуур байрны оюутнуудын дунд дээрэлхэлт байдаг тухай сонсогддог. Ийм асуудлыг хэрхэн шийдвэрлэдэг вэ?

-Би 2023 оноос хойш дотуур байр хариуцан ажиллаж байна. Эрэгтэй оюутнуудын дунд дээрэлхэлтийн асуудал мэр сэр тохиолддог. Бид дотуур байрны журмын дагуу хоёр оюутныг эвлэрүүлэх тал дээр ажиллаж, асуудлыг шийдвэрлэдэг гэв.


МУИС-ийн дотуур байрны оюутан У.Анужин, Би дотуур байранд хоёр дахь жилдээ амьдрах гэж байна. Цахимаар дотуур байраа сонгож, баталгаажуулахад систем их гацдаг. Ийм шалтгаанаас болж оюутнууд дотуур байранд орж чадахгүй тохиолдол элбэг. Нийтийн байр учир ариун цэврийн өрөө, гал тогоо, угаалгын машины хүрэлцээ хангалтгүй.
Энэ жил сургалтын төлбөр дээр дотуур байрны төлбөр нэмэгдсэн санхүүгийн байдалд хүндрэл учруулж байна.

МУИС-ийн дотуур байрны оюутан А.Маралмаа, Манай дотуур байранд олон асуудал тулгардаг. Нэгдүгээрт, нийтийн хөлдөөгчинд мах багтдаггүй.  Хоёрдугаарт, угаалгын машин хүрэлцээ муу. Гуравдугаарт, ариун цэврийн өрөө, халуун усны асуудал юм.
Усанд орохын тулд заримдаа 1-2 цаг дугаарлаж хүлээдэг. Халуун ус 08.00-17.00 цаг буюу бидний яг хичээлтэй байх үед ажилладаг. Хичээл тараад байрандаа ирэхэд халуун ус хаачихдаг.

ШУТИС-ийн I дотуур байранд очиход засварын ажил нь үргэлжилж байгаа  тул оюутнуудаа авч эхлээгүй гэв.

МУБИС-ийн дотуур байранд очиход мэдээлэл өгөх хүн байсангүй. Үйлчилгээний  ажилтнаас нь зарим зүйлийг тодруулахад, Манай дотуур байрны төлбөр энэ жил нэмэгдсэн. Биднийг энэ талаар дур мэдэж яриа өгөхөд загнадаг, яриа өгөхгүй гэлээ. 

“Оюутны өргөө” II дотуур байранд бүртгүүлж буй оюутан, Дотуур байрны төлбөр өмнөх жилийнхээс 300-400 мянгаар нэмэгдсэн. Засвар хийсэн л гэсэн. Гэхдээ бид дотогш орж хараагүй байна гэсэн юм.

Дотуур байрны төлбөр өссөн нь санхүүгийн хувьд хүндрэл учруулж байгааг оюутнууд болон эцэг, эхчүүд ярьж байна. Харин их, дээд сургуулиуд төлбөрийн нэмэгдлийг засвар үйлчилгээ, аюулгүй байдлыг сайжруулахад зарцуулдаг гэсэн хариулт өгөв.

МУИС-ийн Сэтгүүл зүйн III курсын А.Мичидмаа