МАН-ын ХХХI Их Хурал өнөөдөр Буянт-Ухаа спорт цогцолборт эхэллээ. МАН-ын 31-р Их хуралд 2000 орчим төлөөлөгч оролцож байна. Тэднээс 1000 орчим хүн үг хэлэхээр бүртгүүлжээ. Хурлыг УИХ-ын дарга асан Д.Амарбаясгалан нээж үг хэлэв. Маргааш өндөрлөх энэ хурлаар МАН-ын Бага хурлын 300 орчим гишүүнийг томилно.
 
Тус хурлаар намын дүрмээ шинэчлэн батлах болжээ. Дүрмийн төслийг боловсруулах салбар хуралдаанд дараах саналуудыг хэлэлцжээ.

• Ялсан намын дарга Ерөнхий сайдад нэр дэвшинэ гэсэн заалтыг хасах, эсхүл УИХ дарга, УИХ бүлгийн дарга болгох
• Ялсан үед намаас нэр дэвшиж, УИХ-оос сонгогдсон Ерөнхий сайд намын мөрийн хөтөлбөрийг заавал хэрэгжүүлэх тухай нэмж оруулах. 
• Намын Бага хурлын гишүүнд зөвхөн намын ИХ ХУРЛЫН төлөөлөгчийг дэвшүүлж сонгох, намын анхан шатны нэгжийн төлөөллийг түлхүү оруулах
• 20.1-т мөн дүүргийн иргэдийн хурлын дарга нар бодлогоор орох тухай нэмж оруулах
• Бага хурлын гишүүний татварыг давхардуулж, анхан шатны дарга нарааас авахгүй бөгөөд анхан шатанд гаргасан зардлыг  дүйцүүлж тооцох
• Намын УЗ-д анхан шатны жирийн гишүүдийн төлөөлөл оруулах
• Намын хяналтын нэгжүүдийн эрх мэдлийг нэмэх, үйл ажиллагааг сайжруулах, 
• 8.6 буюу бүх асуудлыг Хяналтын ерөнхий хороо төвлөрүүлэн шийдэх заалтыг хасах, хяналтыг хараат бусаар хэрэгжүүлэх 

Их хурлаар намын дүрмийн өөрчлөлт, мөрийн хөтөлбөрийн хэрэгжилт, намын даргыг сонгох гэсэн гурван гол асуудлыг хэлэлцэнэ. Намын дүрмийн өөрчлөлтөд намын дарга ерөнхий сайдаар ажиллана гэх бичигдээгүй дүрэм гишүүдийн анхаарлыг татаж маргаан өрнүүлж байгаа аж.

Энэ дүрмийг парламентийн засаглалтай өндөр хөгжилтэй орнууд мөрддөг. МАН-ын энэ бичигдээгүй дүрмийг 10-аад жил мөрдсөн байна. Их хурдаар дүрмийг өөрчилье гэх саналыг намын гишүүд гаргаж байна. МАН-ын даргад Н.Учрал өрсөлдөх аж.

Х.НЯМБААТАР: БИ НАМЫН ДАРГАД НЭР ДЭВШИХГҮЙ, Э.УЧРАЛ ГИШҮҮНИЙГ ДЭМЖИНЭ

МАН-ын 31-р Их Хурал Буянт-Ухаа цогцолборт болж байна. Хурлын үеэр Хотын дарга Х.Нямбаатар сэтгүүлчдийн асуултад хариуллаа.

Тэрээр би намын даргад нэр дэвшихгүй гэдгээ албан ёсоор мэдэгдэж байна. Э.Учрал гишүүнийг намын даргад дэмжинэ. Намын эв нэгдэл чухал гэв.

Маргааш өндөрлөх энэ хурлаар МАН-ын Бага хурлын 300 орчим гишүүнийг томилж, намын даргыг сонгох юм.<

\

"104 ЖИЛИЙН НАСТАЙ МАН-ААР БАХАРХДАГ, МАНАЙ НАМ САЙН АЖИЛЛАЖ БАЙГАА"

МАН-ын Их Хурлын үеэр Завхан аймгийн Улиастай сумаас ирсэн н.Дэлгэрнавч байр сууриа илэрхийлэв.

Тэрээр 2004 онд намын гишүүнээр элсжээ. Намын их хуралд анх удаа оролцож байна. Энэ удаагийн хурлын нийт гишүүдийн 40 хувь нь эмэгтэйчүүд байна гэсэн шийдвэр гарчээ. Энэ дагуу Улаанбаатарт ирсэн байна.

н.Дэлгэрнавч эмэгтэй гишүүдийг түлхүү оролцуулж байгаад талархаж байгаагаа илэрхийлэв. Намын мөрийн хөтөлбөр амжилттай хэрэгжиж байна, ажлаа сайн хийж буй хүмүүс бий. Гэвч цахим сүлжээнд намын үйл ажиллагааг зарим хүн зориуд харлуулдаг гэв.

Я.СОДБААТАР: МАН-ЫН ДОРГИЛТ НИЙГМИЙН ДОРГИЛТ БОЛЖ БОЛОХГҮЙ

МАН-ын Ерөнхий нарийн бичгийн дарга Я.Содбаатар мэдээлэл өглөө. Тэрээр хэлэхдээ, иргэдийн итгэл, гишүүдийнхээ амлалтыг яаж хадгалж биелүүлэх вэ гэдэгт анхаарсан, намын дотоод асуудлаа цэгцэлсэн Их Хурал болно. Өнөөдөр МАН-ыг цаашид хэн удирдах вэ гэдгийг шийднэ.

Намын Их Хурлын өмнө жаран наймын бүлэг дотроо талцаж хуваагдсан. Энэ бол намд ирсэн маш том ачаа байлаа. МАН улс төрийн сонгуульд гурав дараалсан ялалтыг байгуулсан нь дагаад их хариуцлагыг авчирсан. Тиймээс хувийн асуудлаа хойш тавиад хаа хаанаа хариуцлагаа үүрч ажиллах учиртай. МАН-ын доргилт нийгмийн доргилт болж болохгүй. Мөн мөрийн хөтөлбөрүүдээ хэрэгжүүлэхийн тулд Г.Занданшатарын Засгийн газар тогтвортой ажиллах учиртай гэв.

МАН-ЫН ДОРГИЛТ НИЙГМИЙН ДОРГИЛТ БОЛЖ БОЛОХГҮЙ
  
МАН-ын Ерөнхий нарийн бичгийн дарга Я.Содбаатар мэдээлэл өглөө. Өнөөдрийн хуралд МАН-ын 2255 гишүүн оролцож байна. Удахгүй намын даргад нэр дэвшигчид мөрийн хөтөлбөрөө танилцуулна. Өнөөдөр намын даргыг сонгоно. Ингэснээр намын Ерөнхий нарийн бичгийн дарга, Хяналтын хорооны дарга нарыг ч шинээр томилно гэсэн үг.

Өнөө өглөө намын их хурал эхэлснээр намын өмнөх удирдлагуудын үүрэг дуусгавар болсон гэсэн үг. Сүүлийн хоёр сард өрнөсөн үйл явдлаар МАН-ыг дүгнэж болохгүй. Бид 104 жилийн түүхтэй, амьд организм тул хүмүүс зөрчилдөх үе бий. 1990-ээд оны сүүлээр ч нам зүүн төвийнх байх уу, зүүний чиглэлтэй нам байх уу гэх мэт маргаан өрнөж байв. Өнөөдөр намын даргыг сонгоод маргааш дүрмийн өөрчлөлтийг хэлэлцэнэ гэв. 

МАН-ын Их Хурлын үеэр Чингэлтэй дүүргийн засаг дарга Н. Мандуул мэдээлэл өглөө. 

Тэрээр хэлэхдээ, МАН яриа хэлэлцээгээр асуудлыг шийдэж ирсэн туршлагатай. Тэр жишгээр үүссэн нөхцөл байдлыг давж гарна. Нийслэлээс хотын агаарын бохирдлыг бууруулах ажлыг үе шаттай хэрэгжүүлж байна. Урт хугацаанд орон сууцжуулах, төвийн, тархмал дулааны эх үүсвэрт холбож байж утааг арилгана.

Энэ жил бид 5000 айлыг дулаалж, нүүрсэн янданг хийн янданд шилжүүлсэн. Амжилттай болбол 50 мянган айлыг дулаална. Ойрын гурван жилд утааг арилгана гэдэгт итгэлтэй байна.

Хагас коксон нүүрсийг борлуулахад ачаа тээврийн хүндрэлүүд үүсэж байгаа. Бид түлшний олдцыг сайжруулахад бүх талаар анхаарч ажиллаж байгаа. Удахгүй нүүрсний хомсдолгүй болно гэв.

МАН-ын 31-р хурал үдээс хойш хаалттай хуралдаж байна. Хурлын танхим руу сэтгүүлчдийг нэвтрүүлэхээ зогсоолоо. Яг одоо намын даргад нэр дэвшсэн Н.Учрал мөрийн хөтөлбөрөө танилцуулж байна. 

Ерөнхий сайд Г.Занданшатар МАН-ын 31-р их хуралд оролцогчдод хандан үг хэлснийг хүргэж байна.

    
Ард түмний итгэлийг сэргээх “ШИНЭ ИТГЭЛ”-ийг хамтдаа бий болгоё! Монгол Ардын Намын XXXI Их хурлын эрхэм төлөөлөгчид та бүхэн бол МАН-ын нэр хүнд, үйл хэрэг, үнэт уламжлалыг тээгчид, хамгаалагчид, манлайлагчид юм. МАН-ын тулгуур нь та нар, МАН-ын туг нь ч та нар.

Тиймээс бид өнөөдөр намынхаа ирээдүйн ялалтын төлөө, Монгол Улсын ирээдүйд ногдох түүхэн хариуцлагын өмнө хамтдаа хуран чуулж байна. Энэ бол таны, миний, бидний хамтын үүрэг. Энэ бол хамтын тангараг. 

2027, 2028 оны ялалт бол зүгээр нэг улс төрийн зорилт биш. Энэ бол Монголын ирээдүй, монгол хүний амьдрал, бидний хойч үеийн хувь заяаны өмнө хүлээсэн түүхэн хариуцлага юм. Сүүлийн гурван сонгуульд бид хүчээ нэгтгэн, хамтын зүтгэлээр дараалан ялалт байгуулсан. Энэ ялалт бол Ерөнхийлөгч У.Хүрэлсүх тэргүүтэй үе үеийн удирдлагын манлайлал, өөрчлөлт шинэчлэлийн үр дүн, намын гишүүдийн хөдөлмөрийн дүнд бий болсон түүхэн амжилт.

Манай намын XXXI Их хурлаас гарах шийдвэр, хөтөлбөр, дүрмийн шинэчлэл бүр нь үзэл санааны дэвшил, дүрмийн хэрэгжилт, ёс зүйн хариуцлага, манлайллын шинэ стандартыг баталгаажуулахад чиглэх ёстой. Манай нам авлигын эсрэг шинэ тогтолцоо, шударга ёсны шинэ соёл, мэдээлэлд суурилсан хариуцлагын системийг бүрдүүлэхийн төлөө ажиллаж байна.
Ард түмний итгэлийг сэргээх “ШИНЭ ИТГЭЛ”-ийг хамтдаа бий болгоё. Монголын хөгжлийн бүх салбарт эргэлт гаргах “ЭРС ШИНЭТГЭЛ”-ийг бодитоор хэрэгжүүлье!

Ирэх таван жилд эдийн засгийн бүтцийг өөрчилж, өсөлтийг тогтвортой хадгалж, үр өгөөжийг гэр бүлийн амьдралд хүргэх “Шинэ Итгэл - Эрс Шинэтгэл” иж бүрэн бодлогыг Засгийн газар дэвшүүлэн ажиллаж байна.

Монголынхоо төлөө хамтдаа зүтгэж, ард түмэндээ шинэ итгэлийг бий болгож, эрс шинэтгэлийг эхлүүлж, эх орноо хөгжүүлье.
Монголын төлөө 
Монгол хүний төлөө 
Монгол Улсын төлөө 
Ардын нам ард түмэнтэйгээ хамтдаа!
Ардын нам, Ардын засаг мандтугай!
Мөнх тэнгэрийн хүчин дор Монгол Улс мандан бадрах болтугай гэв.