Холимог тулаанч Г.Чинзоригийг Шүүхийн шийдвэрээр баривчлаад байна. Бусдын биед халдаж, хэрцгийгээр зодсон үйлдэлд нь ямар хариуцлага хүлээлгэх талаар ЦЕГ-ын Хэвлэл мэдээллийн төвйн ахлах мэргэжилтэн, Хошууч С.Баярбилэг өнөөдөр /2025.06.30/ сэтгүүлчдэд мэдээлэл өглөө.

Тэрбээр, Нийгмийн сүлжээгээр 6-р сарын 26-ны өдөр машин дээрээ зогсоод бие засаж ёс зүйгүй үйлдэл гаргасан, мөн бусдын биед халдсан бичлэг цацагдсан. Цагдаагийн байгууллагаас бичлэг цацагдсан даруйд тухайн үйлдлийг бүртгэж, шалгалтын ажиллагааг эхлүүлсэн.

Гэмт хэрэг гарсан шалтгаан нөхцлийг тал бүрээс нь шалгаж тогтооно. Гэмт хэрэг үйлдсэн этгээдийг Шүүхийн шийдвэрийн дагуу 48 цагийн хугацаагаар баривчлаад байна. Гэмт хэрэгт холбогдох үндэслэлд тулгуурлан  үргэлжлүүлэн хорих саналыг Цагдаагийн байгууллагаас өнөөдөр Прокурорт хүргүүлээд байна.

-Хохирогчийн бие ямар байна вэ?
-Хохирогч эмнэлэгт хэвтэн эмчлүүлж байгаа гэсэн мэдээлэл өгсөн.

-Энэ гэмт хэрэг хэзээ болсон бэ?
-Зургаадугаар сарын 26-ны өдөр үйлдэгдсэн нь шалгалтын явцад тогтоогдсон. Одоогоор хохирогчийн биед учирсан гэмтлийг тогтоох, хэргийн шалтгаан нөхцөлийг тодруулах зэргээр тал бүрээс нь шалгаж байна.

-Мэргэжлийн тулаанч байсан хүн жирийн иргэний биед халдаж, ноцтой гэмтэл учруулсан нь хэргийг хүндрүүлэх нөхцөл болох уу?
-Тамирчин, цол зэрэгтэйд нь холбогдуулан хуулийн өөр зохицуулалт байхгүй. Үйлдсэн гэмт хэрэг, зөрчилд нь холбогдуулан шалгалтын ажиллагаа явуулж, холбогдох зүйлчлэлийн дагуу шийтгэл оногдуулна.

-Замын голд ёс бус үйлдэл гаргасанд нь холбогдуулан ямар шийтгэл оноох вэ?
-Энэ үйлдлийг хүний биед халдсан гэмт хэргээс нь салган шалгаж, Зөрчлийн тухай хуулиар “Олон нийтийн газарт бусдыг үл хүндэтгэж танхайрсан” гэх зүйлчлэлээр давхар шалгаж байна гэв.