Бямба гарагт Цагаан ордны сурвалжлагчдын холбооны хүлээн авалтын үеэр нэгэн этгээд гал нээсэн. 

Уг халдлагыг Калифорни мужийн оршин суугч, 31 настай Коул Томас Аллен хэмээх эр үйлдсэнийг олон нийтэд ил болгов. 

Халдлага Вашингтон Хилтон зочид буудалд болсон бөгөөд сэжигтнийг хамгаалалтын албаныхан баривчилсны дараа тэрбээр Дональд Трампын засаг захиргааны албан тушаалтнууд руу буудахыг хүссэн гэж мэдүүлсэн талаар эх сурвалжууд мэдээлжээ.

Хүлээн авалтын үеэр буун дуу гарсны дараа хүлээн авалтад оролцож байсан ерөнхийлөгч Трамп тэргүүтэй албан тушаалтнуудыг яаралтай нүүлгэн шилжүүлсэн юм.
АНУ-ын Хууль зүйн яамны мэдээлснээр уг халдлагын зорилго бүрэн тодорхой болоогүй ч урьдчилсан байдлаар төрийн албан тушаалтнууд, магадгүй ерөнхийлөгчийг онилсон байж болзошгүй гэж мэдэгдсэн байна.

31 настай Аллен буу, гар буу мөн хэд хэдэн хутгатай байсан бөгөөд одоогоор халдлагыг ганцаараа үйлдсэн гэж үзэж байгаа аж. 

Тэрбээр өөрийгөө LinkedIn-ий хаяг дээрээ механикийн инженер, видео тоглоом хөгжүүлэгч мөн багш гэж тодорхойлжээ. 

Түүнчлэн 2025 онд Компьютерын ухааны магистрын зэрэг хамгаалсан бөгөөд Steam платформд “Bohrdom” нэртэй тоглоом гаргаж байсан байна. 

ВВС агентлагийн мэдээлснээр Аллен 2024 онд Камала Харрисын сонгуулийн кампанит ажилд 25 ам.долларын хандив өгч байжээ. 

Халдлагын талаар ерөнхийлөгч Трамп "Хэрэв чи нөлөө бүхий хүн бол тэд чамайг онилдог. Харин нөлөөгүй бол чамайг зүгээр орхино. Энэ бол маш аюултай ажил" хэмээн ярьжээ. 

Эх сурвалж: ВВС