Монгол улсын гавъяат тамирчин Отрядын Гүндэгмаа 1978 оны 5 дугаар сарын 23-нд Улаанбаатар хотод төрсөн. Үндэсний БТДС-ийг багш дасгалжуулагчийн мэргэжлээр төгссөн Үндэсний шигшээ багийн тамирчин юм.

О.Гүндэгмаа буудлагын спортоор 15 настайгаасаа хичээллэж эхэлжээ. Тэрээр хийн гар бууны 10м, спорт гар бууны 25 метрийн дасгалуудад өрсөлддөг. Түүний амжилтуудыг дурьдвал:

Дэлхийн аварга шалгаруулах тэмцээний багийн /1998/ болон хувийн /2006/ хүрэл медальтай. Азийн наадмын хувийн /2002/ болон багийн 2006/ хүрэл медальтай. Ази тивийн аварга, Дэлхийн цомын төлөөх шигшээ тэмцээний аварга, Дэлхийн цомын төлөөх цувралуудын алт, мөнгө, хүрэл медальтай. Зүүн Азийн наадмын мөнгө /2005/, Ази-Африкийн наадмын хүрэл медальтай /2005/.

Олимпийн наадамд гурван удаа /1996, 2000, 2004 онуудад/ оролцож шагналт байрт шалгарч байсан.

"Бээжин -2008" олимпийн наадамд оролцох эрхийг Монголын тамирчдаас хамгийн түрүүнд буюу 2005 онд Италийн Милан хотод зохиогдсон дэлхийн цомын төлөөх тэмцээний спорт гар бууны 25 метрийн дасгалд түрүүлж эрх авсан тамирчин юм. Аяллаар явах дуртай, буддын шашин шүтдэг бүсгүй. Дасгалжуулагчаар нь ОУХМ Л. Ундралбат ажиллаж байгаа.

Монгол улсынхаа далбааг дэлхийн дэвжээнд мандуулсан Отрядын Гүндэгмаад Үндэсний портал GoGo.mn-ийн хамт олны зүгээс баяр хүргэж байна.

Үндэсний портал GoGo.mn