Хятадад энэ жил гурав дахь удаагаа шувууны ханиад өвчний улмаас хүн нас барлаа. Хятадын төв хэсэгт 16 настай хүү өнөө өглөө шувууны ханиадны улмаас нас баржээ. Синьхуа агентлагийн мэдээлж буйгаар хүү энэ сарын 8-ны өдрөөс эхлэн өвчилсөн байна.

Өнгөрсөн бямба гаригт мөн Хятадын зүүн хэсэгт 27 настай эмэгтэй шувууны ханиаднаас болж нас баржээ. Түүнийг энэ жилийн хувьд хоёр дах нь хэмээн бүртгэж байсан ч ийнхүү удалгүй дахин нэг тохиол гарлаа. Бүсгүй нэгдүгээр сарын 5-ны өдөр шувууны ханиадны улмаас эмнэлэгт хандаж байжээ. Бүсгүйгээс хоёр ч удаа шинжилгээ авсан ч чухам ямар замаар шувууны ханиадны вирус тээгч болсныг тогтоож чадаагүй байна. Дэлхийн эрүүл мэндийн байгууллагын мэдээлж байгаагаар одоо 2 настай бяцхан охины биеийн байдал мөн шувууны ханиадны вирусээс шалтгаалж хүндэвтэр байгаа гэнэ. Охин энэ сарын 7-ны өдөр халдвар авсан боловч, мөн л ямар замаар авсныг нь тогтоож чадаагүй байгаа аж.

Хятад улсад он гарсаар шувууны ханиадны халдвараас нас барсан анхны тохиолдол нь нэгдүгээр сарын 5-ны өдөр 19 настай эмэгтэй амиа алдсанаар илэрсэн юм. Эмэгтэй есөн ширхэг нугасны махыг Хэбэй мужийн нэгэн хүнсний захаас худалдан авч, өдийг нь зумлаж, улмаар халдвар авсан байна.

Өнгөрөгч 2003 оноос хойш Ази, Европ, Африкийн жар гаруй оронд шувууны ханиадны H5N1 гэгч аюулт вирусын халдвар тархаад байгаа юм.  Харин хойд болон өмнөд Америк, Карибын арлын орнуудаас энэ төрлийн вирус илрээгүй байна.

2003 оноос хойш 200 гаруй хүний амь насыг авч одоод байгаа энэ вирусын халдвар хүнээс хүнд дамжих нь тун цөөхөн тохиолддог ажээ.

М.Жаргал