Блиц:
Нэр: Нэлли
Төрсөн өдөр: 1974.11.02
Өндөр: 178 см
Вэб сайт: www.nelly.net

Алдарт хип хоп од Нэлли АНУ-ын Техаст төржээ. Өдгөө баячуудын тоонд орж хэдэн саяар тоологдох хөрөнгөтэй ч бага насаа борчуудын хороололд өнгөрүүлсэн гэдэг.

Бэйсболлд ухаангүй дуртай Нэлли дунд сургуулийнхаа бэйсболлын шилдэг тоглогч болж байсныг та лав мэдэхгүй байх. Харуудын хөгжим гэгддэг хип хоп дуу Нэллигийн зүрх сэтгэлийг соронзон мэт татаж чадсанаар түүнийг дуучин болох замд хөтөлжээ.

Тэрбээр 1996 онд найз нартайгаа нийлж “ST lunatics” нэртэй хип хоп хамтлаг байгуулсан ч төд удалгүй хамтлагаа орхисон байна. 2000 онд Нэлли "Universal music group" нэртэй дуу бичлэгийн студитэй хамтран ажиллах гэрээ байгуулснаар хип хоп урлагтай хувь заяагаа салшгүй холбосон юм. Рэппэрүүд хар тамхи наймаалж, буудалцаанд оролцож, шоронд хоригдон гэмт хэрэг үйлддэг нь нууц биш. Харин Нэлли энэ бүхнээс хол гэгддэг. Нийгмийн хамаг л эрээн бараан, болж бүтэхгүй зүйлийг шүүмжлэн дуулдаг рэппэрүүдээс буяны үйл хийж, өвчин зовлонд шаналсан, ядуу тарчиг амьдралтай хүмүүст тусалдаг нь тун ховор. Харин Нэлли цусны өвчтэй хүмүүст туслах буяны ажлыг үргэлж зохион явуулдаг. Учир нь түүний эгч Жаки цусны өвчнөөр 31 насандаа өөд болсон аж.

Нэлли тэр бүр хүүхнүүдтэй нэр холбогдоод байдаггүй. 2003 онд дуучин Ашантид сүй тавих савал тавьсан боловч бүсгүй татгалзсан аэ. Энэ тухай Ашанти "Бид зүгээр л болздог байсан. Хэдхэн удаа уулзаад л сүй тавина гэдэг минмй хувьд байж боломгүй зүйл. Тиймээс татгалзсан” хэмээн МТV-гийн хөгжмийн нэвтрүүлэгт орохдоо хэлсэн байдаг.

Рэппэр Нэлли бас шаггүй бизнесмэн гэдгийг та мэдэх үү? Тэрбээр үеэл ах Мартинтай хамтран “Vokal” нэртэй хувцасны сүлжээ дэлгүүр ажиллуулдаг. “Vokal”-ын лого Нэллигийн бүх видео клипэн дээр гардаг. Шүтэн бишрэгчид нь түүнийг сайхан сэтгэлт Нэлли хэмээн өргөмжилдөг. Бусдад тусламжийн гараа харамгүй сунгадаг, дэлхийн хамгийн баян зуун хип хопчдын аравдүгаарт бичигддэг байна.

Блиц:
Нэр: Эминем
Төрсөн өдөр: 1972.10.17
Өндөр: 170 см
Вэб сайт: www.eminem.com

Барууны хип хоп урлагийг дуучин Эминемгүйгээр төсөөлөхийн аргагүй. Хамгийн анхны цагаан арьст хип хоп од гэгддэг Эминем 14 настайгаасаа дуулж эхэлжээ. Хүмүүс түүнийг хэнийг ч, юуг ч хамаагүй дуугаараа шүүмжилж, магтаж, ёжилж, шоолж чаддаг хатуу үгтэй рэппэр гэж хэлдэг. Тэрбээр 1999 онд жинхэнэ хэвлэлийн баатар болж байжээ. Учир нь Эминем шөнийн клубын гадаа зодоон хийж, зэвсэг барин бусадруу дайрсан гэдэг. 2001 оны хоёрдугаар сарын 14-нд түүнийг нууцаар зэвсэг эзэмшсэн, танхайрсан хэргээр шүүхийн танхимд дууджээ. Эл шүүх хурлаар Эминемийг гэм буруугүй хэмээн үзсэн байна.

Харин алдарт хип хоп од шийдвэрийг эсэргүүцэж нууцаар зэвсэг хадгалж байсан буруугаа хүлээн хоёр жилийн ял авсан аж. 1999 оны есдүгээр сард Эминемийн эх Дэбби Мадерс Бригс өөрийн хүүгээ шүүхэд өгч, арван сая ам.доллар нэхэмжлэн дэлхий дахиныг гайхшруулав. Эл дуулиант хэргийн шалтгаан нь Эминем ээжийгээ архаг хар тамхичин хэмээн “The real slim shady LP” цомогтоо дуулсан явдал байлаа.

Харин шүүх хэргийг Эминемийн талд шийдвэрлэж, заргыг буцаасан гэдэг. Тэрбээр 1999 оны зургадугаар сард Кимбэрли Скоттой гэрлэж, 2000 оны наймдугаар сард салсан. Дөрвөн сарын дараа эргэн нийлсэн хэдий ч хос хоёр дахиад л 2001 оны аравдугаар сард салжээ. Энэ мэтчилэн тэд нийт гурван удаа салж нийлсэн байна. Энэ тухай Ким "Энэ олон салалт Эминемээс л болдог байсан. Хувийн амьдрал, хэрүүл маргаан гээд бүх зүйлээ тэр дуундаа оруулж үргэлж намайг бухимдуулдаг. Үүнээс болж би амиа хорлохыг хүртэл оролдож байсан удаатай. Заримдаа түүний занг тэвчихэд үнэхээр хэцүү санагддаг" хэмээн нэгэн сонинд өгсөн ярилцлагадаа хэлсэн удаатай. Харин Эминем гэр бүлээ буцааж авахын тулд юу ч хийхэд бэлэн байгаагаа олон нийтэд зарласан нь түүний шүтэн бишрэгчдэд ихэд таалагдсан гэдэг.