-Газар өмчлөл ер нь ямар шатандаа явж байна?
-Гэр хорооллын газрыг өмчлөөд дуусч байна. Одоогоор өмчлөлт 94 хувьтай байгаа бөгөөд нийт 65 254 өрхөд газар өмчлөх эрх олголоо. Гэр хороололд олгох газар үндсэндээ дуусч байгаа бөгөөд одоо зуслан болон орон сууцны газар өмчлөх л үлдлээ. Нийслэлийн газар өмчлөл, улсын хэмжээний газар өмчлөлийн 80 хувийг эзэлж байна.

-Газар өмчлөхийг хүсвэл иргэд ямар материал бүрдүүлэх вэ?
-Иргэд энэ талаар нэг үеэ бодвол тодорхой мэдээлэлтэй болсон. Тийм олон бичиг баримт шаарддаггүй. Зайлшгүй бүрдүүлэх ёстой бичиг баримтыг бүрдүүлээд дүүргийнхээ газрын албанд өгөх хэрэгтэй. Гэхдээ он удаан жил ашигласан газраа өөрийн нэр дээр болгоод л боллоо шүү дээ.

-"Газар өмчлөхөд нэлээд хөөцөлдөх юм" гэж ярьдаг. Аль тал нь чирэгдэл үүсгээд байна вэ?
-Хэрвээ бичиг баримтаа гүйцэд бүрдүүлээд ирвэл тийм хүндрэл үүсэхгүй. Харин материал хүлээж авсны дараа 90 хонгийн дотор Ниислэлийн Засаг даргын тушаалаар олгоно гэж хуульдаа заасан байгаа. Бид хуулийн дагуу л иргэддээ үйлчилдэг.

-Иргэд орон нутгаас нийслэлийг зорих нь нэмэгдсээр байгаа. Харин Та гэр хорооллын газрыг өмчлөөд дуусч байгаа гэнэ. Тэгэхээр тэдгээр иргэдэд газар олдохгүй гэсэн үг үү?
-Эдгээр иргэдэд хотын төвд газар олгох боломжгүй. Яагаад гэвэл энд өмчлөл үндсэндээ дууссан учраас. Харин хотын захаар газар олгоод, тэнд иргэд маань суурьшиж болно. Гэхдээ 2008 оны газар төлөвлөлтөөр энэ асуудлыг шийднэ. Газар өмчлөлт ирэх оны таван сарын нэгэнд дуусгавар болно.

Н.Өнөрөө