Авто тээврийн нэгдсэн лавлах 1900-1234 дугаарын утас өдөр бүр 08.00-20.00 цагт иргэдэд холбогдох мэдээ, мэдээлэл хүргэж байна. Хэрэв таны тээврийн хэрэгслийн гарах гарцыг хааж зогссон байвал тухайн автомашины эзэмшигчийн холбоо барих утасны дугаарыг дээрх лавлах утсанд хандан авах, эсвэл тухайн тээврийн хэрэгслийн эзэмшигчтэй шууд холбогдох боломжтой боллоо.

Мөн тээврийн хэрэгслийн бүртгэл, улсын дугаар солих, шилжилт хөдөлгөөн бүртгүүлэх, хасуулах, лавлагаа авах, явуулын дугаар олгох, цагийн хуваарь, байршил, үнэ тариф, бүрдүүлэх баримт бичгийн жагсаалт, мөн техникийн хяналтын үзлэгтэй холбоотой мэдээлэл, техникийн хяналтын үзлэгт орох цаг захиалах, хэрэглэгчийн байршилд тохирсон ачаалал багатай салбар хаана байгаа зэргийг мэдэх боломжтой юм байна.

Үүнээс гадна улс, хот хоорондын ачаа, зорчигч, жуулчин тээвэр, авто үйлчилгээ, мэргэшсэн жолооч, тээврийн хэрэгслийн татвар, даатгалтай холбоотой бүхий л мэдээллийг нэг дор хүлээн авах боломж бүрдлээ.

Түүнчлэн орон нутгийн замд яваа ойр дотны хэн нэгэнтэйгээ утсаар харилцах боломжгүй болсон тохиолдолд Авто тээврийн нэгдсэн лавлах үйлчилгээ таны дотны хүнийг хаана явж байгаа талаар үнэн бодит мэдээллийг тусгай зориулалтын хяналтын төхөөрөмжийн тусламжтайгаар мэдээлнэ.

Б.Бямба