"Монкорд" хадгаламж зээлийн хоршооны гишүүд өнөөдөр хэвлэлийн бага хурал хийлээ. Тэд тус хоршоонд хадгаламж байршуулсан ч одоо мөнгөө эргүүлэн авч чадахгүйд хүрчээ.

Сүүлийн 20 жилийн турш тогтвортой ажилласан тул энэ хоршоонд иргэл итгэж мөнгөө хадгалуулсан гэв. Гэтэл Санхүүгийн зохицуулах хороо "Энэ хоршоо бидэнд хуурамч тайлан өгдөг байсан нь илэрсэн. ЦЕГ-ын Эдийн засгийн гэмт хэрэгтэй тэмцэх хэлтэстэй хамтран шалгаж байна" гэсэн хариу өгчээ.

Санхүүгийн зохицуулах хороо энэ хоршооны зөвшөөрлийг өнөөдрийг хүртэлх хугацаанд сунгасаар ирсэн. Иймд хороо хариуцлага үүрэх ёстой гэж үзэн, хэвлэлийн хурлаа Санхүүгийн зохицуулах хорооны гадаа хийв.

Хадгаламж зээлийн хоршоодын (ХЗХ) тухайд сүүлийн арван жилд орлого зардал нь аажим өссөн юм. 2018 онд нийт 5.3 тэрбум төгрөгийн ашигтай ажилласан байна. Манай улсад нийт 279 ХЗХ ажилладаг. Эдгээрийн 198 нь 5.6 тэрбумын ашигтай, 73 нь 0.3 тэрбумын алдагдалтай ажиллажээ.