Электро хөгжмийн томоохон төлөөлөгч, дэлхийн шилдэг DJ Richard Durand-ийн тоглолтыг Маss night club-т энэ сарын 27-нд зохион байгуулах гэж байна. Энэхүү тоглолтыг "DJ Nomads" буюу DJ BUD, Ulzii, Вооgii, ВТВ зэрэг Монголын шилдэг электро хөгжмийн холбоо, ерөнхий зохион байгуулагч "Хит энтертайнмент"-ийн хамтаар санаачилсан аж. Дэлхийн шилдэг 0.1-гээр дамжуулан Монголын орчин үеийн хөгжмийн хөгжил дэвшлийг гадны залууст мэдрүүлж, дараа дараачийн шилдгүүдийг урьж авчрах боломжийг нээж өгч байгаа аж. DJ Nomads, "Хит энтертайнмент"-ийн залуусын ашгийн бус хийдэг ээлжит арга хэмжээнүүдийн нэг нь "DJ Richard Durand Монголд" нэртэй уг тоглолт юм билээ.

Үүний зэрэгцээ Tiger Translate хөтөлбөрийг "Монгол авьяасыг дэлхийн тавцанд, дэлхийн шилдгүүдийг Монголд" уриатайгаар хэрэгжүүлж байна.

Монголын залуу уран бүтээлчдийг дэлхийн тавцанд гаргах зорилгоор уран зураг сонирхогч залуусын дунд орчин үеийн уран зургийн уралдаан зарлаж байгаа аж. Тэргүүн байранд шалгарсан бүтээлд Лондонд болох Тiger Тгаnslate-ийн олон улсын арга хэмжээнд оролцох эрхийн бичиг, хоёр сая төгрөг, II байранд орвол нэг сая төгрөг, III байранд шалгарсан хоёр бүтээлд 500 мянган төгрөг тус тус олгоно. "DJ Richard Durand Монголд" тоглолтын талаар "Хит энтертайнмент" студийн хөтлөгч, редактор Г.Бурмаагаас тодрууллаа.

-Танай студи "DJ Richard Durand Монголд" тоглолт санаачилжээ. Ийм санаа хэзээ төрөв?
-Жилийн өмнөөс энэхүү тоглолтыг Монголд тоглуулъя гэж санаачилсан. Өнгөрсөн хугацаанд энэ хүнтэй холбогдож, уйгагүй хөөцөлдсөний үр дүнд эх орондоо урьж авчрахаар боллоо.

-Анх санал тавихад тэрбээр хэрхэн хүлээж авсан бэ?
-Бидний саналыг энэ хүн анх сонсчихоод Монголд сlub байдаг гэж үү хэмээн гайхаж байсан. Тэрбээр Монголын тухай бараг мэдэхгүй байсан тул бид эх орныхоо танилцуулга, томоохон "сlub"-уудын зургийг явуулахад дуртай зөвшөөрч, Маss night club-ийг тоглолт хийх газраараа сонгосон.

-Тэр Монголд хэзээ ирэх вэ?
-Энэ сарын 27-ны өдрийн 14.00 цагт Монголд ирнэ. Ирээд ХААН РАLАСЕ зочид буудалд бууна. Орой 21.00 цагт "Маss night сlub"-т тоглоно. Тоглолт шөнийн турш үргэлжилнэ. Монголын чадварлаг Nomads DJ Буд, ВТВ, Одонбат нартай хамтаар өөрийнхөө хит болсон бүтээлүүдээ тоглоно. Электро хөгжмийг сонсдог залуустай тэрбээр нэг өдрийг гайхалтай өнгөрүүлнэ гэдэгт итгэлтэй байна.

-Манай залуус түүний ямар дуунуудыг сонирхож сонсдог вэ?
-Түүний хит болсон Lethal Industry, Flight 643 remix, Sweep & Repeat гэх зэрэг олон дууг залуус дуртай сонсдог. Сүүлийн үед Монголын электро сlub-уудад эдгээр дуу явдаг болсон.

-Монголын DJ нар түүнтэй хамтарч уран бүтээл хийх талаар ярилцсан уу?
-Одоохондоо Монголд тоглох тоглолтын талаар л ярилцсан. Магадгүй ирснийх нь дараа манай DJ нар түүнтэй уулзаад өөр өөрсдийнхөө санаа бодлыг илэрхийлэх байх аа.

Г.Батцэцэг