Улсын Их Хурлын Эдийн засгийн байнгын хорооны ээлжит хуралдаан өнөөдөр 13.00 цагт эхэлнэ. Хуралдаанаар:

• Бүгд найрамдах Австри улсын Засгийн газар болон Монгол Улсын Засгийн газар хоорондын Санхүүгийн хамтын ажиллагааны хэлэлцээрийн төслийг
• Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төсөл болон хамт өргөн мэдүүлсэн хууль, тогтоомжийн төслүүд
• Ашигт малтмалын тухай хууль нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоомжийн төслүүд
• Санхүүгийн хэрэглэгчийн эрхийг хамгаалах тухай хуулийн төсөл болон хамт өргөн мэдүүлсэн хууль, тогтоомжийн төслүүд
• УИХ-ын гишүүн Ж.Золжаргал, Ч.Анар, Ц.Мөнхбат, Л.Соронзонболд, Ж.Галбадрах нарын таван гишүүнээс Мэдээллийн технологийн үйлдвэрлэлийг дэмжих тухай хуулийн хэрэгжилтийн талаар Ерөнхий сайдад хандсан асуулыг хариуг хэлэлцэх
• Үндэсний хиймэл дагуул хөөргөх төслийн хүрээнд Монгол Улсад үр өгөөжтэй ашиглах боломжтой олон талт хэрэгцээ шаардлагад нийцсэсн хиймэл дагуулын талаар судлан санал, дүгнэлт боловсруулах үүрэг бүхий ажлын хэсгийн санал дүгнэлтийг хэлэлцэнэ.

Бүгд найрамдах Австри улсын Засгийн газар болон Монгол Улсын Засгийн газар хоорондын Санхүүгийн хамтын ажиллагааны хэлэлцээрийн төслийг Сангийн сайд З.Мэндсайхан танилцуулж байна. 

З.Мэндсайхан, Австри улсын Ерөнхийлөгч Александр Ван дер Беллений 2025 оны 05 дугаар сард хийсэн Төрийн айлчлалын үеэр 60 сая еврогийн эх үүсвэртэй Санхүүгийн хамтын ажиллагааны хэлэлцээрийг байгуулах эрмэлзлэлийн захидлыг хоёр улсын Сангийн яам хооронд байгуулсан.

Хэлэлцээрийн хүрээнд холбогдох яамдаас санал авч, ЭЗХЯ-наас эдийн засаг, нийгмийн үр өгөөж, хөгжлийн бодлого төлөвлөлтийн баримт бичигт туссан байдлаар нь эрэмбэлсэн. Үүний дагуу төслийн жагсаалтыг Австрийн талд хүргүүлэн Санхүүгийн хамтын ажиллагааны хэлэлцээрийн дүнг 65 сая евро байхаар тохиролцсон бөгөөд тус эх үүсвэрээр ХСҮТ, ГССҮТ, ЭХЭМҮТ, УНТЭ, Цэргийн төв эмнэлэг, Төрийн тусгай албан хаагчдын нэгдсэн эмнэлэг, Улсын дуурь бүжгийн эрдмийн театр зэрэг 7 байгууллагын нэн шаардлагатай тоног төхөөрөмжийг шинэчлэх, суурилуулах, хүний нөөцийг чадавхжуулах төсөл хэрэгжүүлэхээр шийдвэрлэсэн.

Уг зээлийн эх үүсвэр нь 1 хувийн хүүтэй, 09 хувийн хүүгийн баталгааны шимтгэлтэй, 19 жилийн хугацаатай, эхний 4 жилд үндсэн төлбөрөөс чөлөөлөгдөх нөхцөлтэй бөгөөд тус хэлэлцээр нь олон улсын хууль дүрмийн дагуу Монгол Улсын их хурлаар заавал батлагдах гэрээ болно. Иймд энэ төслийг хэлэлцэн дэмжиж өгөхийг байнгын хорооны гишүүдээс хүсэв.

УИХ-ын гишүүн О.Батнайрамдал, Дэмжилгүй яах вэ. Зээлийн хүү 1.9 хувь, энэ бол бидэнд олдохгүй зээл. Төлөх хугацаа нь 19 жил. Миний УИХ-д сонссон хамгийн урт хугацааны зээл байх шиг байна. хамгийн гол нь татвар төлөгчдийн мөнгөөр төлөгдөх зээл учир зөв газарт, үр дүнтэй санхүүжилт болоосой гэж хүсэж байна. Дийлэнх нь эрүүл мэндийн салбарт хэрэгжих төсөл байна, зарчмын хувьд зөв гэж харж байна.  

65 сая еврогийн санхүүжилтийн 10 сая еврог нь Дуурь, бүжгийн эрдмийн театрын их засвар, дуу авианы тоног төхөөрөмжийн шинэчлэлд зарцуулна. 

Их засвар хийх үед Дуурийн театрыг хаах уу, театрын барилгад архитектурын өөрчлөлт оруулах уу? УИХ-ын гишүүн Б.Жаргалангийн асуултад ССАЖЗЯ-ны Төрийн төрийн нарийн бичгийн дарга Б.Бат-Эрдэнэ хариулав.

Б.Бат-Эрдэнэ, Зээлийн санхүүжилтээр тайзны арын болон тайзан дээрх үндсэн засал, дуу авианы тоног төхөөрөмж, үзэгчдийн сандал шинэчилнэ. Энэ бол зөвхөн тоног төхөөрөмж шинэчлэх төсөл.

Харин ДБЭТ-ын их засварын ажилд зориулж улсын төсөвт 8.2 тэрбум төгрөг суулгасан. Энэ бол он дамнасан ажил. Энэ жилийн нь төсөвт өртөг 2.6 тэрбум төгрөг. Засварын ажил гүйцэтгэх тендерийн сонгон шалгаруулалтад дотоодын ААН шалгарсан.

Засвар хийхдээ театрын барилгын архитектурт ямар нэг өөрчлөлт оруулахгүй. Зөвхөн дээвэр болон дотор засал, тоног төхөөрөмж зэрэг дэд бүтцийн төсөл. Засвар хийхдээ театрын үйл ажиллагааг бүрэн зогсоохгүй, төлөвлөлтийн дагуу үе шаттайгаар ажиллана гэв.