Афганистанаас гаралтай уулчин Ривер Ахмад дэлхийн хамгийн өндөр уул болох Эверестийн оргилд амжилттай хүрсэн, тус улсын анхны эмэгтэй болж түүхэнд нэрээ үлдээлээ.

31 настай тэрбээр тавдугаар сарын 21-ний өглөө 8,849 метр өндөр оргилд хүрсэн бөгөөд энэхүү авиралтаа Афган эмэгтэйчүүдийн эрх, дүрвэгсдийн тэсвэр хатуужил, сэтгэцийн эрүүл мэндийн талаарх ойлголтыг нэмэгдүүлэх зорилготой хийсэн гэж мэдэгджээ.

Түүний амьдрал сорилт бэрхшээлээр дүүрэн байжээ. Тэрээр өсвөр насандаа Талибаны халдлагаас амьд гарч, улмаар гэр бүлийн хамт эх орноо орхин дүрвэхээс өөр аргагүй болсон байна. Хожим Австралид суурьшсаны дараа уулын спортдоо эргэн орж, Эверестэд авирах мөрөөдлөө биелүүлэхээр бэлтгэжээ.

Түүний амжилтыг олон улсын хэвлэлүүд Афган эмэгтэйчүүдэд итгэл найдвар өгсөн үйл явдал хэмээн онцолж байна. Ялангуяа Афганистанд эмэгтэйчүүдийн боловсрол, ажил эрхлэлтэд хатуу хязгаарлалт үйлчилж буй энэ үед Ахмадын оргилд хүрсэн амжилт нь “боломжгүй мэт санагдах саадыг даван туулж болно” гэсэн хүчтэй мессеж болж байна.

Ахмад өөрийн авиралтыг зөвхөн хувийн амжилт бус, мөрөөдлөө биелүүлэх боломжгүй болсон олон сая афган охид, эмэгтэйчүүдэд зориулсан бэлгэдэл гэж тодорхойлжээ.

Эх сурвалж: CNN