УИХ-ын чуулганы хуралдаан эхэллээ. Өнөөдрийн хуралдаанаар дараах асуудлыг хэлэлцэнэ.

• Хэлэлцээр соёрхон батлах тухай хуулийн төсөл
• Монгол Улсын Үндсэн хуулийн цэцийн 2026 оны 04 дүгээр дүгнэлт /Монгол Улсын Ерөнхийлөгчийн тухай хуулийн 6 дугаар зүйлийн 1 дэх хэсэг Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/
• Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөл 
• Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөлтэй хамт өргөн мэдүүлсэн хуулийн төсөл 
• Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хууль хүчингүй болсонд тооцох тухай хуулийн төсөл
• “Улсын төсвийн хөрөнгө оруулалтаар төсөл, арга хэмжээг санхүүжүүлэх талаар авч хэрэгжүүлэх зарим арга хэмжээний тухай” Улсын Их Хурлын тогтоолын төсөл
• Хүүхдийн хөгжлийг дэмжих тухай хуулийн төсөл болон хамт өргөн мэдүүлсэн хуулийн төсөл 
• Монгол Улс дахь хүний эрх, эрх чөлөөний байдлын талаарх 25 дахь илтгэл
• “Монгол Улс дахь хүний эрх, эрх чөлөөний байдлын талаарх 25 дахь илтгэлийг хэлэлцсэнтэй холбогдуулан авах зарим арга хэмжээний тухай” Улсын Их Хурлын тогтоолын төсөл
• Хувь хүний орлогын албан татварын тухай хуульд өөрчлөлт оруулах тухай хуулийн төсөл 
• Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд 
• Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд
• Улсын нисэхийн тухай хууль /Шинэчилсэн найруулга/- ийн төсөл болон хамт өргөн мэдүүлсэн хуулийн төслүүд 
• БНМАУ-ын Засгийн газарт эрх олгох тухай хууль хүчингүй болсонд тооцох тухай хуулийн төсөл 
• “Засгийн газарт чиглэл өгөх тухай” Улсын Их Хурлын тогтоолын төсөл
• Нийгмийн даатгалын үндэсний зөвлөлийн гишүүнийг томилох, чөлөөлөх тухай асуудал

ЧУУЛГАН ШУУД ҮЗЭХ: 

УИХ-ын чуулганы хуралдаанаар Монгол Улсын Үндсэн хуулийн цэцийн 2026 оны 04 дүгээр дүгнэлт /Монгол Улсын Ерөнхийлөгчийн тухай хуулийн 6 дугаар зүйлийн 1 дэх хэсэг Монгол Улсын Үндсэн хуулийг зөрчсөн эсэх маргааныг хянан шийдвэрлэсэн тухай/ асуудлыг хэлэлцэж байна. 

Үүнтэй холбоотойгоор УИХ-ын гишүүн Х.Баасанжаргал "ҮХЦ-ийн дүгнэлт сүүлийн үеийн бусад дүгнэлттэйгээ холбоотой байна гэж харж байна. 

Нэгдүгээрт, Ерөнхийлөгчийн тухай хуулийг Үндсэн хуульд нийцүүлэхгүй эс үйлдэл гаргаж, ҮХЦ-ээр ийм дүгнэлт гаргаж байгаа нь ямар учиртай вэ? 

Зөвхөн Ерөнхийлөгчийн бүрэн эрхийн хугацаанаас гадна өөр олон тогтолцооны гажуудлыг Ерөнхийлөгчийн тухай хуулиар шийдүүлэх ёстой. Гэтэл өнгөрсөн зургаан жилийн хугацаанд санаатай эс үйлдэл гаргалаа. 

Үүнийг бид бүгд мэдэж байгаа. Та нар бүгд зориуд эс үйлдэл гаргаж байна. ҮХЦ-ээс өчигдөр гаргасан дүгнэлтийг /ҮХЦ Дээд шүүхийн ерөнхий шүүгчийг зургаан жилээр зөвхөн нэг удаа томилох гэснийг хүчингүй болгох тогтоол гаргасан/ өнөөдөр чуулганаар ярихгүй гэж байна. Гэхдээ энэ нь өнөөдөр бидний хэлэлцэж байгаа дүгнэлттэй холбоотой гэж харж байна. 

ҮХЦ өмнө нь гаргасан шийдвэрүүдээ олон удаа өөрчилж байсан. Сонгууль, давхар дээл, сайд нартай холбоотой асуудлыг ҮХЦ хэчнээн удаа өөрчилснийг бид мэднэ. 

ҮХЦ шийдвэрээ өөрчилж болдог. Гэхдээ энэ удаа Улсын Дээд шүүхийн ерөнхий шүүгчийн дахин томилгооны асуудлыг яагаад нээв? Энэ бол зөвхөн ерөнхий шүүгчийн асуудал биш. Зургаан жилээр нэг удаа сонгогддог бусад албан тушаалтнууд Дээд шүүхээр далимдуулж туршилт хийчихлээ" гэв.