Сэлбэ голын түшиц хана болон тохижилтын ажлын нийт явц 75 хувьтай үргэлжилж байна. Ажлын явцын талаар УБЗАА-ны Хотын инженерийн дэд бүтцийн газрын дарга Л.Алтангэрэл мэдээлэл өглөө. 

Тэрээр, “2023 онд Сэлбэ гол үерлэж, энд 80 орчим орон сууцны зоорин давхар усанд автсан. Тухайн үед 40 тэрбум төгрөгийн шууд, бус хохирол учирсан. 

Иргэдийн амь нас, эд хөрөнгийг хамгаалахын тулд голын эрэг дээр байсан “S Outlets” дэлгүүрийг буулган, 1.4 км урттай түшиц хананы ажлыг эхлүүлсэн. Ханын бетон хийцлэлийн ажил дууссан, гадна эрэг болон голын эрэг орчмын тохижилтыг хийж байна. 

Сэлбэ гол Дамбадаржаа, Долоонбуудалын орчим 160-200 метр орчим өргөн. Харин энэ орчимд 40-50 метр өргөн тул түшиц хана барих ёстой болсон” гэлээ. 

“Силла констракшн” ХХК-ийн ерөнхий менежер Х.Халиун “Ногоон байгууламжийн ажил 14 хоногийн өмнө эхэлсэн. Үрсэлгээ, газар шорооны ажил, олон настын үр суулгах, зүлгээ хамгаалах ажил хийж байна. Нийт 8378 ам метр талбайд ногоон тохижилтын ажил хийх төлөвлөгөөтэй. Үүнээс 3000 гаруй ам метр талбайд ногоон зүлэг тарилаа. Үрсэлгээнээс хойш зүлгийг 21 хоног арчилж  бүрэн ургадаг” гэлээ.

НЗДТГ-ын Хэвлэл мэдээлэл, олон нийттэй харилцах хэлтэс