ОХУ болон Умард Солонгосыг заагладаг Түмэн голын дээгүүр авто замын гүүр барих ажлыг эхлүүлснийг талууд өнгөрсөн оны тавдугаар сард зарлаж байв.

Тэгвэл энэ бүтээн байгуулалт бараг дуусах шатандаа орсон нь хиймэл дагуулын зургаас харагдаж байгааг ВВС агентлаг мэдээлжээ. 

Орос, Украины дайнд Умардын талаас ОХУ руу цэргүүдээ илгээж тусалснаас хойш талуудын харилцаа улам гүнзгийрсний нэг баталгаа нь уг бүтээн байгуулалт юм. 

Энэ гүүр бүрэн ашиглалтад орсноор талуудын хооронд зэвсэг техникийн бараа бүтээгдэхүүнүүд зөөвөрлөх чухал гарц болно гэж шинжээчид үзэж байна. 

Түмэн гол дээгүүр барьж буй шинэ авто замын гүүр нь хоёр улсыг холбодог одоогийн цорын ганц төмөр замын гарц болох “Найрамдлын гүүр”-ээс хэдхэн зуун метрийн зайд байрлаж байгаа аж.

Сүүлийн үеийн хиймэл дагуулын зургаас нэг километр урттай гүүр, түүнтэй холбогдох шинэ авто замууд, хилийн шалган нэвтрүүлэх цэг, дэд бүтэц болон автомашины зогсоолууд харагдаж байна.

Энэ гүүр нь өдөрт 300 хүртэлх тээврийн хэрэгсэл, 2850 хүн нэвтрүүлэх хүчин чадалтай гэж ОХУ-ын Зам тээврийн яамнаас мэдээлж байв. Төслийн нийт өртөг есөн тэрбум рублиэс давсан.

Уг гүүрийг барих тохиролцоог талууд 2024 онд буюу ОХУ-ын ерөнхийлөгч Владимир Путин Умард Солонгост айлчлах үеэр хийсэн юм. 

Эх сурвалж: ВВС