БНХАУ-ын Батлан хамгаалахын сайд асан Вэй Фэнхэ болон Ли Шанфу нарт авлигын хэрэгт холбогдуулан цаазаар авах ял оноосон ч гүйцэтгэлийг хоёр жилээр түдгэлзүүлэх шийдвэр гарсан талаар тус улсын төрийн хэвлэл мэдээллээ.

Уг хугацаа дууссаны дараа бүх насаар нь хорих ял болгон өөрчлөх аж. Мөн ялыг хөнгөрүүлэх болон хугацаанаас нь өмнө суллах боломжгүй.

Түдгэлзүүлсэн цаазын ял гэдэг нь цаазын ял оноосон ч гүйцэтгэлийг хоёр жилээр хойшлуулж, энэ хугацаанд санаатай гэмт хэрэг үйлдээгүй бол ялыг нь бүх насаар хорих ял болгон өөрчилдөг тогтолцоо аж.

Шүүхийн шийдвэрийн хүрээнд тэдний бүх хувийн хөрөнгийг улсын орлого болгожээ.

Вэй Фэнхэ нь 2018-2023 онд Батлан хамгаалахын сайдаар ажиллаж байсан бөгөөд түүний дараа Ли Шанфу уг албан тушаалд томилогдсон ч мөн оны аравдугаар сард албан тушаалаасаа огцорсон юм.

Ли Шанфу олон нийтийн үйл ажиллагаанд оролцох нь цөөрсний дараа түүнийг албан тушаалаас нь чөлөөлөх болсон гэх мэдээлэл тухайн үед гарч байв.

Ройтерс агентлагийн мэдээлснээр Ли Шанфуг их хэмжээний авлига авсан болон бусдад хээл хахууль өгсөн хэрэгт буруутгасан байна.

Мөн мөрдөн шалгалтаар түүнийг улс төрийн үүрэг хариуцлагаа биелүүлээгүй, өөртөө болон бусдад давуу эрх олгосон гэж үзжээ. 

Харин Вэй Фэнхэгийн хувьд их хэмжээний мөнгө, үнэт зүйл авлигаар авсан, албан тушаалын томилгоонд хууль бус давуу байдал олгосон гэх хэрэгт холбогдсон байна.

Сүүлийн жилүүдэд Ши Жиньпиний удирдлага дор БНХАУ-д авлигын эсрэг өргөн хүрээтэй ажиллагаа эрчимжиж, цэргийн өндөр албан тушаалтнуудыг ээлж дараалан шалган огцруулж байгаа юм.

Эх сурвалж: ВВС