Улсын Их Хурлын Өргөдлийн байнгын хорооны өнөөдөр (2026.05.05)-ийн хуралдаан 11.05 цагт Улсын Их Хурлын гишүүн Х.Баттулга, Ц.Идэрбат, М.Сарнай, Ж.Галбадрах, Г.Лувсанжамц, Д.Рэгдэл, Ч.Ундрам, Х.Жангабыл, Ц.Мөнхтуяа, О.Саранчулуун, О.Номинчимэг нарын буюу 52.4 хувийн ирцтэйгээр эхэллээ.

Байнгын хорооны хуралдааны эхэнд Ерөнхий боловсролын сургуулийн хоол үйлдвэрлэл, үйлчилгээний тухай хуулийн биелэлтийг хангуулах, суралцагчдад чанар, аюулгүй байдлын шаардлага хангасан шим тэжээллэг хоол хүнсээр үйлчилж, тэдний оюуны болон бие бялдрын өсөлт хөгжлийг дэмжих чиглэлээр санал, дүгнэлт болон шийдвэрийн төсөл боловсруулах үүрэг бүхий ажлын хэсгийг байгуулж, тогтоол гаргав.

Ерөнхий боловсролын сургуулийн “Үдийн хоол” хөтөлбөрийн хэрэгжилтийн талаарх Боловсролын, Эрүүл мэндийн болон Хүнс, хөдөө аж ахуй, хөнгөн үйлдвэрийн сайд нар, Нийслэлийн Засаг дарга бөгөөд Улаанбаатар хотын захирагчийн мэдээллийг Байнгын хорооны энэ оны дөрөвдүгээр сарын 01-ний өдрийн хуралдаанаар сонсож, хэлэлцсэн юм..

Энэ талаар УИХ-ын гишүүн Ч.Ундрам: Сурагчдын үдийн цай хөтөлбөрийг 2020-2024 онд УИХ-ын эмэгтэй гишүүд "үдийн хоол" хөтөлбөр болгож төсвийг нь тодорхой хэмжээнд нэмэгдүүлсэн. Одоо бид хоол үйлдвэрлэл, үйлчилгээний чанар, аюулгүй байдал дээр ажиллах юм.

Хоолны чанар, аюулгүй байдалтай холбоотойгоор ЕБС болон СӨБ-ын сургуулиудад хелико бактерийн тархац их байна. Үүнтэй холбоотой ариун цэврийн асуудлыг тус тогтоолын нэгдүгээр хэсэгт нэмж оруулах саналтай байна.

УИХ-ын гишүүн Ц.Мөнхтуяа: Хүүхдийн үдийн хоолны асуудалд хүүхдийн хоолоор бизнес хийдэг мафийн асуудал хөндөгддөггүй. Хэдхэн тооны компани л хүүхдийн хоол нийлүүлдэг. Тэдгээр компаниудын нийлүүлсэн хоол зах зээлийн үнээс маш өндөр үнэтэй, чанаргүй. Энэ асуудаар сургуулийн захирлуудаас надад маш олон мэдээлэл ирдэг. Энэ асуудлаар Л.Энх-Амгалан сайдтай хамтран ажиллах болно.

Хүүхдийн ходоод руу орж байгаа хоолны чанарын асуудлаар бид мафийн сүлжээтэй тэмцэхээс эхэлнэ гэж бодож байна. Сургуулийн орчинд тогооч нар байгаа материалдаа тохируулан сэтгэл зүрхээ зориулан хүүхдүүдэд хоол бэлтгэж байгаа. Гэтэл нийлүүлж байгаа хоолны бүтээгдэхүүнийг тоотой хэдэн компаниас ав гэж дээрээс тушаадаг. Энэ асуудлыг одоо таслан зогсооё.

Үдийн хоолыг аравхан минутад өгдөг. 40-50 хүүхэд шаагилдаад ангийнх нь багш хичээл орсон ч биш, ороогүй ч биш замбараагүй байдал үүсдэг. Үдийн хоолны цагийг уртасгах хэрэгтэй. Мөн чанарт анхаарчихвал түгээлтийн хоол нь илүү дээр. Багш аягалаад явахаар хэцүү. Хичээлээ заах уу, хоол аягалах уу болдог. 

Гишүүд саналаа хэлж дууссанаар Ерөнхий боловсролын сургуулийн хоол үйлдвэрлэл, үйлчилгээний тухай хуулийн биелэлтийг хангуулах, суралцагчдад чанар, аюулгүй байдлын шаардлага хангасан шим тэжээллэг хоол хүнсээр үйлчилж, тэдний оюуны болон бие бялдрын өсөлт хөгжлийг дэмжих чиглэлээр санал, дүгнэлт болон шийдвэрийн төсөл боловсруулах үүрэг бүхий ажлын хэсгийг байгуулж, тогтоол гаргалаа.

Ажлын хэсгийг УИХ-ын гишүүн Х.Баасанжаргал ахалж, бүрэлдэхүүнд УИХ-ын гишүүн О.Саранчулуун, Д.Ганмаа, Ц.Мөнхтуяа, Ч.Ундрам, М.Сарнай нар ажиллахаар болов.