Нийслэлийн МАН-ын хорооны хурал өнөөдөр (2026.04.23) болж байна. Хурлаар тус хорооны даргыг сонгох тухай асуудлыг хэлэлцэх эсэх нь тодорхойгүй байгаа. 

Хотын дарга Х.Нямбаатар “Нийслэлийн намын хорооны гишүүн, тэргүүлэгчээс чөлөөлөх тогтоолын төслийг хэлэлцэж батална. Мөн хуралд оролцож буй хүмүүсээс нийслэлийн намын хороны даргад нэр дэвшиж, даргыг өөрчилж, чөлөөлөх асуудлыг оруулж ирж болно. Энэ мэтчилэн асуудлыг хэлэлцэхээр төлөвлөсөн” гэв.

Хуралдаа оролцохоор ирж буй гишүүд хэвлэлд ярилцлага өгөв.  НИТХ-ын төлөөлөгч, Улаанбаатар хотын Ус сувгийн удирдах газрын дарга Ц.Төрхүү “Хотын дарга Х.Нямбаатар сүүлийн хоёр жилд сайн ажилласан. Улаанбаатарт өмнө нь хийгдээгүй олон төслийг эхлүүлсэн” гэлээ. 

Хотын дарга Х.Нямбаатар Нийслэлийн МАН-ын хорооны даргаар жил гаруйн хугацаанд ажиллаж буй. Хорооны хурал жилд нэг болдог.