БНСУ-ын цагдаа нар алдарт BTS хамтлагийг гаргаж ирсэн HYBE агентлагийн үүсгэн байгуулагчийг баривчлах хүсэлт гаргажээ. 

BTS-ээс гадна NewJeans, TXT, LE SSERAFIM, ENHYPEN зэрэг олон хамтлагийг гаргаж ирсэн Бан Ши Хёк хувьцааны хууль бус арилжааны хэрэгт сэжиглэгдэж байгаа юм. 

Тодруулбал түүнийг 2019 онд хөрөнгө оруулагчдыг төөрөгдүүлж, Hybe компанийн хувьцааг анхдагч зах зээлд гаргахаас өмнө бусдад зарж, 200 тэрбум воны хууль бус ашиг олсон байж болзошгүй гэж үзэж буй. 

Өдгөө 53 настай Бан үүнийг няцааж байгаа юм. 

Энэ хэрэг урт хугацаанд үргэлжилж байгаа бөгөөд компанийн төв байранд нэгжлэг хийх, зарим хөрөнгийг нь битүүмжлэх, түүнийг ТУЗ-ийн даргын албан тушаалаас огцрохыг шаардах хүртэл арга хэмжээ авсан. 

Мөн түүнд энэ оны наймдугаар сараас эхлэн хилийн хориг тавиад байгаа юм. 

БНСУ-ын хуулиар хууль бус арилжаагаар тав ба түүнээс дээш тэрбум воны орлого олсон бол таван жилийн хорих ялаас бүх насаараа хоригдох ял хүртэл сонсох боломжтой. 

Алдарт BTS хамтлаг дөрвөн жил завсарласны дараа аялан тоглолтоо эхлүүлээд байгаа бөгөөд баривчлах хүсэлт аялан тоглолт эхэлснээс хэдхэн долоо хоногийн дараа гарлаа. 

Шинжээчдийн тооцоогоор Hybe агентлаг уг аялан тоглолтоос нэг тэрбум ам.доллар ба түүнээс дээш орлого олох боломжтой.

Эх сурвалж: ВВС