АНУ-ын ерөнхийлөгч Дональд Трамп мягмар гарагт Ирантай байгуулсан гал зогсоох хэлэлцээрийг сунгана гэж мэдэгдлээ. 

Энэ нь өмнө нь тохиролцсон хоёр долоо хоногийн турш гал зогсоох хугацаа дуусахаас хэдхэн цагийн өмнө гарсан шийдвэр юм.

Трамп хүч хэрэглэж магадгүй гэсэн мэдэгдлээсээ ухарч, Пакистаны тавьсан хүсэлтийг хүлээн зөвшөөрсөн гэв. 

Тэрбээр "Ираны эрх баригчид нэгдсэн санал боловсруулж гаргах хүртэл тус улсад хийх довтолгоогоо түр хойшлуулна" гэсэн байна. 

Пакистан улс нь долоо долоо хоногийн турш үргэлжилж буй энэ дайнд талуудын хооронд зуучлагчийн үүрэг гүйцэтгэж байгаа юм. 

Түүнчлэн Трамп Ираны боомтуудад тавьсан бүслэлтээ үргэлжлүүлнэ гэдгийг хэлжээ. 

Одоогоор АНУ-ын холбоотон Израил болон Ираны талаас гал зогсоох хугацааг сунгахтай холбоотойгоор ямар нэг хариу мэдэгдэл гаргаагүй байна.

Ираны хувьсгалт гвардтай холбоотой мэдээллийн агентлагийн дамжуулснаар Иран гал зогсоох хугацааг сунгах хүсэлт гаргаагүй бөгөөд АНУ-ын бүслэлтийг цуцлуулахын тулд хүч хэрэглэхэд бэлэн гэжээ.

Мөн Ираны парламентын даргын зөвлөх нь Трампын дээрх мэдэгдлийг "Цаг хожиж, гэнэтийн довтолгоо хийх гэсэн нэг арга" хэмээн ярьсан байна. 

АНУ, Ираны талуудын хооронд хоёр дахь шатны яриа хэлэлцээ өрнөх эсэх нь тодорхойгүй хэвээр байна. 

Эх сурвалж: Reuters