УИХ-ын Төсвийн байнгын хорооны хуралдаанаар (2026.04.15) Хүү, торгуулийн орлогын бүрдүүлэлт, зарцуулалтад хийсэн гүйцэтгэлийн аудитын тайланг хэлэлцлээ.

2023–2024 онд хүү торгуулийн орлогын эх үүсвэрээс 322.7 тэрбум төгрөг төвлөрүүлэхээр төлөвлөснөөс 361.2 тэрбум төвлөрсөн байна.

Улмаар нийт орлогын 97.2 хувийг орон нутгийн төсөвт, 2.8 хувийг улсын төсөвт төвлөрүүлжээ.

Аудитаар 32.3 тэрбум төгрөгийн зөрчил илэрсэн бөгөөд үүнд 2.9 тэрбум төгрөгийн зөрчилд төлбөрийн акт, 12.4 тэрбум төгрөгийн зөрчилд 41 албан шаардлага, 17 тэрбум төгрөгийн зөрчилд 163 зөвлөмжийг шалгагдагч байгууллагуудад хүргүүлснийг Ерөнхий аудитор С.Магнайсүрэн танилцуулав.

Аудитын дүн, дүгнэлтэд үндэслэн хүү, торгуулийн орлого бүрдүүлэгч байгууллагуудын мэдээллийн нэгдсэн санг бий болгох, хууль эрх зүйн орчны уялдааг сайжруулах, мөн улсын төсөвт төвлөрсөн орлогыг харьяалах орон нутгийн төсөвт шилжүүлэх зөвлөмжийг Сангийн яаманд өглөө.

Түүнчлэн хугацаа хэтэрсэн торгуулийн үлдэгдлийг үе шаттайгаар барагдуулах арга хэмжээ авч ажиллахыг зөвлөлөө. Мөн хүү торгуулийн орлогын төлөвлөлтийг бодит судалгаа, мэдээлэлд тулгуурлан хийх, торгуулийн орлогыг зориулалтын дагуу зарцуулах, хяналтыг сайжруулах чиг үүргээ хэрэгжүүлэх зөвлөмжийг төсвийн ерөнхийлөн захирагч нарт өгөв.