УИХ-ын Төсвийн байнгын хорооны хуралдаанаар Туулын хурдны зам төслийн төсвийг шалгах ажлыг хэсэг байгуулах тогтоолын төслийг хэлэлцэн ажлын хэсэг байгуулах шаардлагагүй гэж үзжээ. 

““Туулын хурдны зам” төслийн эдийн засгийн үр ашиг, техник эдийн засгийн үндэслэл, төсөвт өртөгтэй холбоотой асуудлыг шалган судлах үүрэг бүхий ажлын хэсэг байгуулах тухай” Байнгын хорооны тогтоолын төслийг хэлэлцэх хуралд УИХ-ын 29 гишүүний 17 нь буюу 58.6 хувийн ирцтэйгээр оролцсон байна. 

Байнгын хорооны дөрөвдүгээр сарын 01-ний өдрийн хуралдаанаар “Туулын хурдны зам” төслийн эдийн засгийн үр ашиг, техник эдийн засгийн үндэслэл, төсөвт өртөг, санхүүжилтийн эх үүсвэр, төсөвт үзүүлэх нөлөөлөл, гүйцэтгэгчийн сонгон шалгаруулалтын талаар мэдээлэл сонссонтой холбогдуулан Улсын Их Хурлын гишүүн Р.Батболдоос дээрх асуудлыг нарийвчлан судалж, холбогдох санал, дүгнэлт гаргах зорилгоор Төсвийн байнгын хорооноос ажлын хэсэг байгуулж ажиллах хүсэлтийг гаргасан байна. 

““Туулын хурдны зам” төслийн эдийн засгийн үр ашиг, техник эдийн засгийн үндэслэл, төсөвт өртөгтэй холбоотой асуудлыг шалган судлах үүрэг бүхий ажлын хэсэг байгуулахыг дэмжье” гэдэг саналын томьёоллоор санал хураалт явуулахад, хуралдаанд оролцсон гишүүдийн 47.2 хувь нь дэмжив. Өөрөөр хэлбэл, хуралдаанд оролцсон гишүүдийн олонх уг асуудлаар ажлын хэсэг байгуулах шаардлагагүй гэж үзлээ.

Ажлын хэсэг байгуулах шаардлагагүй гэж үзсэн гишүүд, 

1. Б.Чойжилсүрэн, 
2. Ц.Даваасүрэн, 
3. Ж.Алдаржавхлан, 
4. Т.Аубакир
5. Х.Булгантуяа, 
6. Б.Заяабал, 
7. П.Сайнзориг, 
8. Б.Пүрэвдаваа, 
9. З.Мэндсайхан
10. Ч.Номин нар дэмжээгүй байна. 

Харин Н.Алтанхуяг, Д.Энхтүвшин, Д.Цогтбаатар, Б.Мөнхсоёл, Н.Наранбаатар, Г.Ганбаатар, Ж.Батсуурь, Ж.Батжаргал, Р.Батболд нар ажлын хэсэг байгуулахыг дэмжжээ. Мөн УИХ-ын гишүүн Н.Алтанхуяг, Ж.Батсуурь, Г.Ганбаатар, Д.Цогтбаатар, Б.Мөнхсоёл нар ажлын хэсэг байгуулах санал хураалтыг дахин явуулах горимын саналтай байлаа. Байнгын хорооны дарга Н.Наранбаатар Монгол Улсын Их Хурлын чуулганы хуралдааны дэгийн тухай хуульд ийм асуудлаар горимын саналаар санал хураалт явуулахгүй гэж заасныг мэдэгдсэн гэж УИХ-ын Хэвлэл мэдээлэл, олон нийттэй харилцах газраас мэдээлэв.

ХҮН нам: Туулын хурдны замыг барьснаас уулын замыг өргөтгөх нь илүү өгөөжтэй