Зам, тээврийн сайд Б.Дэлгэрсайхан (2026.04.13) “АЗЗА” нэгтгэлийн ТӨХК-ийн аймаг, орон нутаг дахь төлөөлөл, автозамын компанийн удирдлагууд, “АЗЗА”-ны Үйлдвэрчний Эвлэлийн удирдлагууд, Монголын автозамчдын Үйлдвэрчний эвлэлийн хорооны дарга нарыг хүлээн авч уулзлаа.

Засгийн газрын шийдвэрээр 2023 оноос автозамын засвар, арчлалтын үйл ажиллагааг нэгдсэн удирдлагаар хангах, үр ашгийг нэмэгдүүлэх зорилгоор төрийн өмчит 20 компанийг нэгтгэн “Авто замын засвар, арчлалтын нэгтгэл” (ТӨХК) болгон өөрчлөн зохион байгуулсан.

Улмаар орон нутаг дахь салбар нэгжийн бүтэцтэйгээр үйл ажиллагааг нь төвлөрүүлсэн. Мөн тус компанийн төрийн эзэмшлийн хувьцаа эзэмшигчийн эрхийг Зам, тээврийн яам хэрэгжүүлэхээр болсон. Гэвч өнөөдөр улс орон даяар 21 аймгийн “АЗЗА” нэгтгэлийн салбаруудын санхүүгийн нөхцөл байдал хүндэрч, санхүүжилтээ тухай бүрт нь авч чадахгүй байгаагаас ажилчдынхаа цалинг 2-3 сараар нь олгож чадахгүйд хүрээд байгааг Зам, тээврийн сайд Б.Дэлгэрсайханд уламжиллаа.

Сайд автозамын салбарын бодлого, төлөвлөлтийг бодит нөхцөлтэй уялдуулах, ажилчдын нийгмийн баталгааг сайжруулах чиглэлд анхаарч ажиллахаа илэрхийлээд, санхүүжилтийн 30 хувийг ойрын хугацаанд шийдвэрлэж, автозамчдын цалин хөлсийг олгох асуудалд нэн тэргүүнд анхаарч ажиллахаа илэрхийллээ.

Эх сурвалж: Зам тээврийн яам