Баянзүрх, Сүхбаатар, Чингэлтэй дүүргийн эрүүгийн анхан шатны тойргийн шүүхэд эрх мэдэл, албан тушаалын хэрэгт холбогдоод буй З.Энхболд, Б.Энх-Амгалан нарт холбогдох хэргийн шүүх хурал болж байна.

Хэрэг шүүхэд шилжээд гурван жил өнгөрч буй бөгөөд анхан шатны шүүхээр гурав дахь удаагаа хэлэлцэж байгаа юм. Хэргийн дэлгэрэнгүйг ЭНД-ээс унших боломжтой. 

Шүүгдэгч Б.Энх-Амгалан: 

-З.Энболд, Б.Энх-Амгалан хоёр яаж яваад гэмт хэргийн хатгагч, хатгуулагч болчхов оо. Үүнийг би ойлгохгүй байгаа тул дахиад тайлбарлуулмаар байна. 

Би З.Энхболдын хамаарал бүхий компаниар нэг хүрз нүүрс ч угаалгаагүй. Бид хоёр ямар ч холбоо хамааралгүй хүмүүс. Би Зам тээврийн, хөгжлийн яаманд, З.Энхболд Төрийн ордонд суудаг байсан, хоёулаа л төрийн хамгаалалттай газарт ажиллаж байсан. Бид хоёр уулзаж байсан бол тэр хамгаалалтын газарт нь бүртгэгддэггүй юм уу. Ийм бүртгэл байгаа юм уу, шалгаад өгөөч. 

Бид хоёр нэг ч удаа уулзаж, нэг удаа утсаар ярьж үзээгүй. Уулзсан, утсаар ярьсныг нотлох нэг ч баримт байхгүй. 

Шүүгдэгч З.Энхболд:

-Өмнө нь цагаатгасан шийдвэр гарсан. Гэтэл дахиад яллах дүгнэлтээ үг, үсгийн зөрүүгүй давтаж уншиж байна. Ялагдсан яллах дүгнэлтээ өөрчилж оруулж ирэхгүй бол шүүх өмнөтэй л адилхан шийднэ шүү дээ. Гурав дахь удаагаа яагаад өөр юм оруулж ирж уншихгүй байгааг прокуроруудаас асуумаар байна. Прокурорууд өмнө нь нэг удаа ялагдсан шүү дээ.