ХХААХҮ-ийн сайд Ц.Идэрбат УИХ-ын Байгаль орчны байнгын хорооны хуралдаанд оролцож байна. Тэрээр УИХ-ын гишүүдийн асуултад хариулж байна. УИХ-ын гишүүн П.Батчимэг "Х.Болорчулуун ХХААХҮ-ийн сайдын зөвлөхөөр ажиллах болжээ. 

Энэ хүн ЖДҮХС-гийн зээл, үхрийн ээмэгжүүлэлт гэх мэт шуугианд холбогдсон шүү дээ. Сайдын зөвлөхөөр ажиллахад тохирох хүн мөн үү?" гэж асуув.

Ц.Идэрбат сайд хариуд нь "Х.Болорчулуун гурван удаа УИХ-ын гишүүнээр ажилласан туршлагатай. Би өчигдөр зөвлөхөөрөө ажиллуулах тушаал гаргалаа. АТГ-т урьдчилсан мэдүүлгээ өгөөд ашиг сонирхлын зөрчилгүй гэж дүгнэсэн. Энэ хүн ХХААХҮ-ийн сайдаар ажиллах явцад манай салбарын экспорт өссөн.

Гадаадад их сургууль төгссөн,  хэл устай гэхээс илүүтэй малчны амьдралыг сайн мэдэх, хөдөөгийн амьдралыг ойлгодог хүн сайдын зөвлөхөөр ажиллах ёстой гэж үзсэн" гэв.