УИХ дахь Ардчилсан намын бүлэг хуралджээ. Хурлаар хэлэлцсэн асуудлын талаар тус намын дарга О.Цогтгэрэл нар мэдээлэл хийлээ.

Ардчилсан намын дарга О.Цогтгэрэл:

-Хоёр асуудал хэлэлцлээ. Ерөнхийлөгчөөс УИХ-ын гишүүнийг эргүүлэн татахтай холбоотой хуулийн төслийг УИХ-д өргөн барьсан. Үүнтэй холбоотойгоор Ардчилсан нам өнгөрсөн 7 хоногт УИХ-ын чуулганаас завсарлага авсан, үүнд байр сууриа нэгтгэлээ.

Мөн Үндэсний аюулгүй байдлын зөвлөлийн нарийн бичгийн дарга, албан тушаалтан УИХ-ын чуулганы үеэр ёсзүйгүй авир ааш гаргасан. Үүнтэй холбоотойгоор ҮАБЗ-д шаардлага хүргүүлэх нь зүйтэй гэж үзэв.

УИХ-ын гишүүнийг эргүүлэн татахтай холбоотой энэ хуулийн төсөлд бид байр сууриа нэгтгэж амжилгүй ирлээ. Бүлгийн хуралд өнөөдөр 25 гишүүн оролцож бүгд дэмжихгүй гэдэг байр суурьд нэгдсэн. Энэ нь Ардчилсан нам энэ хуулийн төслийг үзэл баримтлалынх нь хувьд дэмжихгүй гэсэн шийдвэр юм.  

УИХ-ыг ямар ч дархлаагүй болгох үзэл санаа энэ хуульд явж байгаа. Монгол Улсын тусгаар тогтнолын баталгаа нь ардчилсан парламент. Энэ парламент дархлаагүй болбол Монгол хүний эрх, эрх чөлөө ухарна, баталгаагүй болно. 

УИХ дахь Ардчилсан намын бүлгээс Үндэсний аюулгүй байдлын зөвлөлд хүргүүлж буй шаардлагад: 

-Үндэсний аюулгүй байдлын зөвлөлийн Нарийн бичгийн дарга А.Бямбажаргал нь энэ сарын 9-ний өдрийн УИХ-ын нэгдсэн чуулганы хуралдааны үеэр УИХ-ын гишүүн Б.Жаргалангийн асуултад зохих ёсоор хариулахын оронд түүнийг илтэд гүтгэн доромжилсон үйлдэл гаргасан. Энэ нь төрийн албаны ёс зүй, хууль дээдлэх ёсонд ноцтой харшилж байна.

Тэрбээр Төрийн албаны тухай хуульд заасан бусдын ажил хэрэгч саналыг үл хайхрахгүй байх, мушгин гуйвуулахгүй байх тухай заалтыг зөрчсөн. Иймд А.Бямбажаргалд ёсзүйн болон хуулийн хариуцлага хүлээлгэхийг шаардаж байна гэжээ.