Эрүүл мэндийн сайд Э.Батшугараас сэтгүүлчид өнөөдөр /2026.04.10/ зарим зүйлийг тодрууллаа.

-Та салбартайгаа танилцаж амжив уу. Ажлаа юунаас эхэлж байна вэ?
-Би өөрийгөө Эрүүл мэндийн яамны сайд гэж харахгүй, Монгол Улсын 3.5 сая иргэний эрүүл мэндийг хариуцсан хүн гэж харж байна. Эрүүл мэндийн салбарт нэгдүгээрт, нийгмийн эрүүл мэндийн боловсрол буюу өвчлөхөөс сэргийлэх, хоёрдугаарт, эрүүл мэндийн тусламж үйлчилгээний чанарыг сайжруулах буюу өвдвөл яаж түргэн шуурхай, өндөр чанартай тусламж үзүүлэх талаар анхаарал хандуулна.

Энэ бүхнийг хийх нэг том зохицуулалт нь төсөв. Эрүүл мэндийн даатгалын сан 2.4 их наяд төгрөгийн төсөвтэй, 2025 оны байдлаар даатгалаас 2.6 сая иргэн ямар нэг хэмжээгээр эмнэлгийн тусламж, үйлчилгээ авсан байна.

ЭМДС нь 700 бүлэг өвчний 15 мянган онош болон 669 эмийн хөнгөлөлтийн дэмжлэг үзүүлдэг. ЭМДС-гийн нэг төгрөг бүрийг яаж үр дүнтэй болгох, эрүүл мэндийн тогтолцоог сайжруулах, татвар төлөгчдийн төлсөн мөнгө иргэндээ хүргэх вэ гэдэг нь чухал.

-Эрүүл мэндийн салбарын худалдан авалтын ажиллагаанд ашиг сонирхлын зөрчил маш их гардаг гэж шүүмжлэл бий. Үүнийг хэрхэн цэгцлэх вэ?
-Манай эрүүл мэндийн салбар бүр дампуурчихсан салбар биш. Нэг худалдан авагчийн тогтолцоо нь муу биш, Азидаа дээгүүрт орон боломжийн тогтолцоо. Өөрчилж, сайжруулах асуудал мэдээж бий.

Тухайлбал, нэг нэр төрлийн эмийг эмнэлгүүд өөр өөр үнээр худалдан авч байна. Эмнэлэг бүхэнд тус тусад нь тендер зарладаг тул нэг эмийг нэг эмнэлэг 1000 төгрөгөөр авч байхад өөр нэг эмнэлэг нь 2000, 3000 төгрөгөөр ч авч байх жишээтэй. Уг нь нэг үйлдвэрийн, орц найрлага нь яг адилхан эм шүү дээ. 

Тиймээс улсын эмнэлгүүдийн тендерийг нэгтгэн томоор нь зарлах нь зүйтэй. Нэг дор олныг худалдан авахад үнэ хямдарна. Эргээд иргэдэд очих эмийн үнэ хямдарна. Энэ мэтээр засаж, сайжруулах ажлууд байна.