УИХ-ын гишүүн Ж.Баярмаа төрийн ордонд сэтгүүлчдийн сонирхсон асуултад хариулт өглөө. 

Тэрбээр, "Харбины гэрээ бол маш чухал гэрээ. Энэ гэрээг хянан шалгах түр хороог байгуулах уу, үгүй гэдэгт дуншиж дуншиж санал хураах гэж байна. 

Эндээс маш олон зүйлийг харуулах байх. Өмнөх бүх оффтейк гэрээнүүд бүгд асуудалтай байсан. Тэр бүү хэл 44 их наядын асуудал байна гэж сонсголын үеэр яригдаж байсан.

Тэгэхээр ийм их дүнтэй, ийм их асуудал дагуулсан гэрээнүүдийг бид нар цаг алдалгүй шалгаж, хэрэв асуудал байвал засаж сайжруулъя л гэж ярьж байгаа. 

Үүн дээр бид хардах сэрдэх асуудлууд үүсээд байгаа юм л даа. Яагаад гэвэл 2024 оны хоёрдугаар сард "ЭТТ" компанийн БЭТ н.Ганбатын бичсэн тайлан бий. Тэр тайланд маш тодорхой тусгасан зүйл бол айлын тал буюу БНХАУ-ын тал нь 250 сая тонн нүүрсийг 16 жилийн турш авахдаа биржийн үнээр авъя гэдгийг хүлээн зөвшөөрсөн. Гэхдээ бизнес наймаа л болсон хойно таван хувийн хөнгөлөлт өгөөч гэсэн байдаг. 

Энэ нь биржийн үнэ 100 доллар байх юм бол 5 доллар хямдруулаад бүхэл бүтэн 95 ам.доллараар зарах боломж байсныг нь байхгүй болгоод 50, 60 ам.доллар болгох гэх мэтээр хоёр дахин хямд үнээр 16 жилийн турш Монгол Улсын баялгийг худалдахаар болсон. Энэ асуудалд иргэдийнхээ өмнөөс маш их санаа зовж байгаа учраас "Харбины" гэрээг хянан шалгах түр хороог байгуулж шалгах гээд байгаа юм.

Ийм их дүнтэй нууцлалтай гэрээний ард дандаа хулгай, завчаа явж байгаа. Нэг тонноос хэдэн ам.доллар завшиж байгааг мэдэхгүй байна" гэв.