УИХ-ын чуулганы үдээс хойшх хуралдаан дараах асуудлыг хэлэлцэхээр үргэлжилж байна. 

• Санхүүгийн хоршооны тухай хууль /шинэчилсэн найруулга/-ийн төсөл болон хамт өргөн мэдүүлсэн хуулийн төслүүд /Улсын Их Хурлын гишүүн Д.Үүрийнтуяа, Б.Заяабал нар 2025.12.31-ний өдөр өргөн мэдүүлсэн, хэлэлцэх эсэх, асуулт асуух хугацаа 120 минут/
• Монгол Улсын Их Хурлын тухай хуульд өөрчлөлт оруулах тухай хуулийн төсөл болон  болон хамт өргөн мэдүүлсэн хуулийн төслүүд /Улсын Их Хурлын гишүүн Х.Тэмүүжин нарын 17 гишүүн 2025.11.20-ны өдөр өргөн мэдүүлсэн, хэлэлцэх эсэх, асуулт асуух хугацаа 120 минут/

Санхүүгийн хоршооны тухай хууль /шинэчилсэн найруулга/-ийн төслийг хэлэлцэж байна. 

Уг хуулийг санаачилсан Д.Үүрийнтуяа хэлэхдээ "Хадгаламж зээлийн хоршоод төр оролцоогүй, зөрчилгүй байвал харьцангуй тогтвортой, өсөлттэй байсан. Бид уг хуулиар эрх зүйн орчныг сайжруулахыг зорьсон" гэв. 

Санхүүгийн зохицуулах хорооноос зөвшөөрөлтэй 172 ХЗХ ажиллаж байна. Дэлхийн хүн амын 15-20 хувь нь хадгаламж зээлийн хоршоогоор үйлчлүүлдэг байна. Монгол Улсын хувьд нийт хадгаламж зээлийн хоршоодын 55 хувь нь орон нутагт, түүний 80 хувь нь сумын төвд үйл ажиллагаа явуулдаг. 

Байрлалаар авч үзвэл 50 хувь нь баруун аймагт байна. Баян-Өлгий аймгийн Цэнгэл суманд байрлах ХЗХоршоонд нутгийн иргэдийн 90 хувь үйлчлүүлдэг. Тиймээс уг хуулийн төсөл батлагдвал гурван давхар хамгаалалттай бичил санхүүгийн институц бий болж банк хүрч үйлчлэх боломжгүй орон нутагт хүрэх, зардал хэмнэх боломжтой гэж харж байна хэмээн Санхүүгийн зохицуулах хорооны дарга Т.Жамбаажамц хэллээ. 

УИХ-ын гишүүн Б.Уянга "Нөөц санд мөнгө байрших юм байна. Менежментийг нь хэрхэн хийх вэ? Зээл үү, бусад хэлбэрээр гарахгүй юм байна гэж ойлгосон. Ямар тооцоо судалгаа байгаа вэ? Хэчнээн хэмжээний мөнгө хуримтлагдах төлөвтэй байна вэ? Хадгаламжийн даатгалыг 20 сая хүртэлх төгрөг байна гэжээ. Энэ дүнг сонгосон үндэслэл юу вэ?" хэмээн асуусан юм. 

Монгол Улсын Их Хурлын тухай хуульд өөрчлөлт оруулах тухай хуулийн төсөл болон  болон хамт өргөн мэдүүлсэн хуулийн төслүүдийг хэлэлцэж байна. 

Улсын Их Хурлын гишүүн Х.Тэмүүжин нарын 17 гишүүн 2025.11.20-ны өдөр өргөн мэдүүлсэн юм. Энэ хуулийн төслийг тодруулбал, УИХ-ын дарга нам бус байх, гишүүд дотроос УИХ-ын даргыг сонгох  юм.