Мьянмарын цэргийн бүлэглэл болох Жунтагийн тэргүүн Мин Аун Хлайнг парламентын санал хураалтаар ерөнхийлөгч боллоо. 

Ийнхүү тэрбээр 2021 онд төрийн эргэлт хийж засгийн газрыг түлхэн унагаснаас таван жилийн дараа улс төрийн эрх мэдлээ албан ёсоор баталгаажуулав.

Өнгөрсөн оны арванхоёрдугаар сард болсон парламентын сонгуулиар цэргийн дэмжлэгтэй нам олонх болсноор Жунтагийн тэргүүн улсынхаа ерөнхийлөгч болж буй нь энэ юм. 

Өдгөө 69 настай түүний удирдсан төрийн эргэлт олон хүний эсэргүүцэлтэй нүүр тулж, улмаар улс даяарх зэвсэгт мөргөлдөөнд хүргэсэн.

Түүнээс хойш Мьянмарт цэргийнхэн болон зэвсэгт бүлэглэлүүдийн хооронд иргэний дайн үргэлжилж байгаа бөгөөд тэдний олонх нь өөрсдийн хяналтад байгаа нутаг дэвсгэр дээр сонгууль явуулахыг зөвшөөрөхгүй гэдгээ мэдэгдсэн.

Мин Аун Хлайнг засгийг түлхэн унагаж, цэргийн дэглэм тогтоосныхоо дараа "Нэг жилийн дотор сонгууль зохион байгуулж иргэний засаглалд шилжинэ" гэсэн амлалтыг өгч байв. 

Гэхдээ энэ амлалт нь таван жилийн дараа хэрэгжиж байна. 

Мин Аун Хлайнг хуулийн дагуу парламент түүнийг ерөнхийлөгчөөр сонгохоос өмнө албан тушаалаа хүлээлгэн өгсөн юм. 

Түүний энэ үйлдлийг олон улсын шинжээчид "Иргэний засаглал нэрийн дор олон улсад хүлээн зөвшөөрөгдөхийн зэрэгцээ цэргийн байгууллагын ашиг сонирхлыг хамгаалсаар байх стратегийн алхам" хэмээн тодорхойлж байна.

Эх сурвалж: Reuters