УИХ-ын гишүүн, ЗГХЭГ-ын дарга асан С.Бямбацогт Төрийн ордонд хэвлэлийн хурал хийв.

Тэрээр "Би 2008-2012 оны хооронд УИХ-ын гишүүнээр ажилласан. Тав дахь удаа парламентад ажиллаж байна. Парламентын туршлагыг үндэслэн УИХ-ын даргад намайг нэр дэвшүүллээ гэж намын дарга Н.Учрал хэлсэн. 

Дэлхий нийт дайны байдалд байна. Үүний сөрөг нөлөөг бид амсаж хэлсэн. Төр түвшин, түмэн олон амгалан байх ёстой. Сайд нарыг яаралтай томилох шаардлага бий. Энэ асуудлыг хурдан шийдэх болов уу гэж харж байна. Парламентад таван нам суудалтай. Бид ойлголцохын тулд илүү идэвхтэй ажиллах шаардлага бий. 

Хууль тогтоолыг хурдан батлах шаардлага ч байна. МАН-ын бүлгийн дотор үл ойлголцсон асуудал бий. Үүнийг шийдэж, Засгийн газар, УИХ-ын үүргийг тогтвортой явуулах ёстой. Үүнд УИХ-ын даргын үүрэг их" гэв.

Улс төрийн талцлын улмаас иргэдийн амьдрал яаж дорддогийг би өмнө нь харсан, мэдэрсэн. Гишүүдээ нэгтгэх туршлага надад бий. Урагшаа харж, улс орны эрх ашгаа нэгдүгээрт тавих нь зөв. Намын эрх ашиг хоёрдугаарт байна.

УИХ-ын дарга хууль тогтоох байгууллагын үйл ажиллагааг тасралтгүй явуулах, намуудын дунд ойлголцол бий болгох үүрэгтэй. Би улс төрийг хойш тавина. Хуулийг нийт гишүүдийн олонхоор баталдаг. МАН-ын цөөнхийн бүлгээс буюу УИХ-ын гишүүн Ч.Ганзориг УИХ-ын дарга нам бус байх тухай хуулийн төсөл боловсруулсан. Энэ төслийг батлах, эсэх нь УИХ-ын эрх мэдэл юм. 

Ерөнхий сайд манай тал, танай тал гэж үзэлгүйгээр сайд нараа сонгох байх.          

Би 2019 онд бид Үндсэн хуулийн нэмэлт өөрчлөлт дээр ажилласан. Хяналт тэнцэл их чухал. Эрх мэдлийн хуваарилалтыг оновчтой, боловсронгуй болгоход Үндсэн хулийн нэмэлт өөрчлөлт томоохон ахиц авчирсан. 2019 оны Үндсэн хууль их чухал. Үүний дараа 2020 онд УИХ-ын тухай хуулийг би санаачлан батлуулсан. Цаашид парламентыг улам сайжруулахын төлөө ажиллана.

УИХ-ын гишүүдийн нэр хүнд унаж байгаад анхаарна. УИХ-ын даргын суудал дараагийн албан тушаалын шат болохгүй. Би 2027 оны Ерөнхийлөгчийн сонгуульд нэр дэвшихгүй. Рио Тинто-той хийж буй хэлэлцээний багт ажиллаагүй. Гэхдээ өмнөх Засгийн газрын байр суурь хэвээрээ байна, үргэлжилнэ. "Баялагтаа эзэн Монгол" хөтөлбөрийг бид хэрэгжүүлэх ёстой. Иргэд өгөөжийг тэнцүү хүртэх ёстой юм. 

"Ачит ихт", "Зэс эрдэнийн хувь" гэсэн Эрдэнэтийн үүсмэл ордыг ашигладаг гурван компанийн өгөөжийн 60 хувийг төр авах хэлцлийг бид ийсэн. Цаашид гэрээ болгон, УИХ-д өргөн барьж, 60 хувийн өгөөжөө авах ажлыг эхлүүлнэ. Өгөөж гэдэгт татвар, төлбөр, хураамж, ногдол ашгийг оруулсан.

Махны үнэ өсөж, иргэдийн амьжиргаанд нөлөөлж эхэллээ. Иймд Засгийн газрыг нэн даруй бүрдүүлэх нь чухал. Ерөнхий сайдын бүрэн эрх л хэрэгжиж эхэлсэн. УИХ даргагүй байгаа тул  УИХ-ын гишүүд өргөсөн тангарагтаа үнэнч байж улсынхаа эрх ашгийг эрэмбэлээсэй. УИХ-ын дарга, сайд нарыг яаралтай томилно гэж найдаж байна.

Надад сандал ширээ ногдоогүй бол би дэмжихгүй гэж болохгүй гэв.