Зураач Н.Ринчин-Очирын “Тэнгэрийн хэл” бие даасан үзэсгэлэн Г.Занабазарын нэрэмжит Дүрслэх урлагийн музейд маргааш 13:00 цагт нээнэ.
 
Үзэсгэлэнд монгол зургийн уламжлалт арга, хэлбэрийг орчин үеийн хэллэгт хөрвүүлж, хүн ба байгалийн салшгүй холбоог дүрслэлийн хэлээр хүүрнэсэн 30 гаруй бүтээлүүд дэлгэх юм. 

Түүний бүтээлүүдийг дараах гурван агуулгад хувааж болно.
Хөдөлгөөн ба орон зай: Хөдөлгөөний эрчим, орон зайг харуулсан бүтээлүүд багтана. Морьдыг салхи, үүл мэтээр дүрсэлсэн нь үзэсгэлэнгийн хамгийн хүчтэй, динамик хэмнэлийг илэрхийлнэ. 
Үл үзэгдэх оршихуй: Илүү дотогшоо чиглэсэн, сүнслэг ертөнцийн тухай өгүүлнэ. Байгалийн шороон будгийн арга ажиллагаа нь нүдэнд үл үзэгдэх, зөвхөн мэдрэмжээр хүрч болох нууцын тухай өгүүлнэ. 
Домог ба түүхэн хэлхээ: Уламжлалт монгол зургийн элементүүд орчин үеийн хэлбэрт шилжиж буй бүтээлүүд багтана. Хүн, амьтан, байгалийн нэгдэл, ахуйн гүн ухааныг домгийн хэлээр хүүрнэнэ.

"Тэнгэрийн хэл бол зүрхний хэл юм. 
Тэнд үг үгүйдэж, зөвхөн мэдрэмж л үнэн байдаг.

Зураач Н.Ринчин-Очир Монголын Урчуудын Эвлэлийн гишүүн, “Монгол зураг” нийгэмлэгийн гишүүн, “Шинэ өглөө” нэгдлийн тэргүүн, "Мөнгөн мод 2025" наадмын "Дүрслэх урлагийн шилдэг бүтээл"-ийн эзэн уран бүтээлч, Монгол Улсын Соёлын тэргүүний ажилтан цолтой.

Хугацаа: 2026.04.02- 2026.04.08
Цагийн хуваарь: Өдөр бүр 09:00-17:30