"Монголын шог зураг" маркийн нээлтийн ёслол Олон улсын Инээдмийн баярын өдрөөр Монгол Улсын Үндэсний Номын Сангийн Үнэт ховор номын музейд боллоо.

Монголын хэвлэл мэдээлэл, дүрслэх урлагийн салбарт үнэтэй хувь нэмэр оруулж, тухайн цаг үеийнхээ улс төр, нийгмийн амьдралыг ёгтлол, шог зургаар уран сайхны аргаар илэрхийлсээр ирсэн "Тоншуул" сэтгүүлийн 90 жилийн ойд зориулан "Монголын шог зураг" сэдэвт шуудангийн маркийг албан ёсоор гүйлгээнд гаргаж байна.

Уг маркт Монголын шог зургийн хөгжлийн үе шатыг төлөөлсөн, нэрт уран бүтээлчид болох А.Гүрсэд, В.Одгийв, Ц.Доржготов, Ц.Байды, С.Цогтбаяр, А.Бат-Эрдэнэ нарын 1960-2000 оны хооронд бүтээсэн нийгмийн шүүмжлэл, ёгтлол, хошигнолыг уран сайхны түвшинд илэрхийлсэн бүтээлүүдийг нэг дор багтааснаар Монголын шог зургийн урлагийн хөгжил, онцлогийг цогцоор нь харуулжээ. 

Ёслолыг Соёлын гавьяат зүтгэлтэн, шог зураач С.Цогтбаяр хөтлөн явуулж, "Монгол шуудан" ХК-аас маркийн дээжээс хүндтэй шог зураачид, номын сангийн захиралд гардуулан өгсөн ба төгсгөлд нь уран бүтээлчид өөр өөрсдийн эрхлэн хэвлүүлсэн бүтээлийн дээжээс Монгол Улсын Үндэсний Номын Сангийн сан хөмрөгт хандивласан байна.

Эх сурвалж: Монголын Улсын Үндэсний номын сан