УИХ-ын Төсвийн байнгын хорооны хуралдаан үргэлжилж байна.

Хуралдаанаар Туулын хурдны зам төслийн эдийн засгийн үр ашиг, техник эдийн засгийн үндэслэл, төсөвт өртөг, санхүүжилтийн эх үүсвэр, төсөвт үзүүлэх нөлөөлөл, гүйцэтгэгчийн сонгон шалгаруулалттай холбогдох мэдээллийг авч байгаа юм. 

Байнгын хорооны хуралдаан нэлээн ширүүхэн өрнөж байна. Хуралдааны явцад нийслэлийнхэн болон УИХ-ын гишүүдийн хооронд асуулт асуух, хариулт өгөх явцад хэд хэд зөрчилдөөд авав.  

Энэ зөрчил даамжирч, хуралдааны дундуур УИХ-ын гишүүн Д.Энхтүвшин Нийслэлийн Засаг даргын нэгдүгээр орлогч  Т.Даваадалайтай ам муруйж биед нь халдан, газар унагаав. Хуралдааны танхимын гадаа болсон үйл явдалд тэрбээр тайлбар өгөөгүй бөгөөд хуралдаанд эргэн орж ирснийхээ дараа нийслэлийнхний хандлагаас болоод ёс зүйгүй үйлдэл гаргачихлаа, Т.Даваадалайгаас уучлалт хүсье гэсэн юм.

Нийслэлийн Засаг даргын нэгдүгээр орлогч Т.Даваадалай болсон үйл явдлын талаар "Хотын даргыг 00 орсон гэснийг хэлсний төлөө намайг томорлоо гээд чирж гаргаж ирээд цохилоо" хэмээн тайлбарласан юм.