УИХ-ын Төрийн байгуулалтын байнгын хорооны хуралдаан /2026.03.30/-аар Монгол Улсын Ерөнхий сайдаар Ням-Осорын Учралыг томилох тухай асуудлыг хэлэлцэн, санал хураахад гишүүдийн олонх буюу 95.8 хувийн саналаар дэмжсэн билээ.

Одоо УИХ-ын гишүүд Н.Учралыг Ерөнхий сайдад томилох талаар хэлэлцэж, түүнээс асуулт асууж байна. 

УИХ-ын гишүүн С.Цэнгүүн: Туулын хурдны замын төсөлтэй холбоотойгоор хэлэлцүүлэг хийсэн. Олон эрдэмтэн, мэргэжилтнүүд ирж үгээ хэлсэн. Гэтэл үгээ хэлснийхээ төлөө террорист гэж нэрлэгдэж байна. УИХ-ын гишүүд мөн байр сууриа илэрхийлээд доромжлуулж байна. Та МАН-ын даргын хувьд хотын дарга Х.Нямбаатарт ямар арга хэмжээ авах вэ. 

Ерөнхий сайдад нэр дэвшигч Н.Учрал: Хотод үүссэн асуудалд анхаарал хандуулъя. Холбогдох мэдээллийг авъя. Манай намаас сонгогдсон албан тушаалтнууд иргэдийг дээрээс нь харж болохгүй. Нэг л тохиолдолд дээрээс нь харж болно. Тэр бол унасан хүнийг босгохын тулд. Сахилгатай, хариуцлагатай, ёс зүйтэй байхыг шат шатны албан тушаалтнаас шаардана. Бүх хүнд энэ адилхан үйлчилнэ. Энэ асуудалд би анхаарал хандуулъя.

Н.Учрал: Манай Засгийн газар бүтээлч хүн бүрийг дэмжинэ. Хувийн хэвшлийг дэмжинэ. Шөнө унтаж босоод гаргадаг гэнэтийн шийдвэрүүдийг бүгдийг нь болиулна. 

УИХ-ын чуулганы нэгдсэн хуралдаан үргэлжилж байна. УИХ-ын гишүүд асуулт асууж дууслаа. Ингээд үг хэлэх гишүүдийн нэрсийг авахад 14 гишүүн нэрээ өгсөн бөгөөд УИХ-ын гишүүд "Өө" хэмээн шуугилдаж байв. Чуулганы нэгдсэн хуралдааны ирц 84.6 хувь байна. 

УИХ-ын гишүүн Б.Бат-Эрдэнэ: Бүгдээрээ нэрээ татчих гэдэг санал гаргаж байна. Сая баахан үг хэлж, саналаа хэллээ шдэ. Эртхэн шиг Засаг төрөө эмхэлье гэсэн санал гаргаж байна. (Гишүүд дэмжиж алга ташив)

УИХ-ын гишүүн С.Эрдэнэболд: Ерөнхий сайдаа томилох гэж байна. Нэг хоёр цагийн наана цаана байх хэрэгтэй. Та нар наад зангаа хувийн компанидаа л гарга. 

УИХ-ын гишүүд үг хэлж дуусан, санал хураалт эхэллээ. Санал хураалтад 107 гишүүн оролцсоноос 88 гишүүн дэмжиж 82.2 хувийн саналаар Ням-Очирын Учрал Ерөнхий сайд боллоо.